Quzyrly organdar ruqsatsyz satylatyn 241 pırotehnıkany anyqtady

ASTANA. KAZINFORM — Astana qalasynda ishki ister organdary dástúrli túrde «Pırotehnıka» jedel-aldyn alý is-sharasyn ótkizdi. Bul jóninde Qalalyq kommýnıkatsııalar qyzmetinde ótken brıfıngte Astana qalasy Tótenshe jaǵdaılar departamenti bastyǵynyń orynbasary Ǵabıt Babaev pen Polıtsııa departamentiniń aǵa ınspektory Azamat Ámen málimdedi. 

Іs-shara ótken jyldyń 5 jeltoqsanynan bastap, 3 qańtarǵa deıin jalǵasqan. Onyń negizgi maqsaty — azamattyq maqsattaǵy pırotehnıkalyq buıymdardy satý jáne satyp alý talaptarynyń saqtalyp jatqanyn baqylaý, sondaı-aq sertıfıkattalmaǵan ónimdi zańsyz satý derekterin anyqtap, jolyn kesý.

Tekserý barysynda pırotehnıkalyq ónimderdiń aınalymyna qatysty zańnama talaptarynyń oryndalýyna basa mán berilgen. Ásirese ruqsat qujattary joq saýda oryndary men shaǵyn saýda núkteleri nazarǵa alynǵan.

Sonymen qatar satylyp jatqan ónimderdiń sáıkestik sertıfıkattarynyń bolýy tekserildi.

Buǵan qosa, pırotehnıkalyq buıymdarǵa memlekettik jáne orys tilderinde qoldaný nusqaýlyǵynyń qosa berilýi de baqylanady.

Quzyrly organdardyń málimetinshe, ruqsat qujattarynsyz pırotehnıkalyq buıym satý boıynsha 15 derek anyqtalǵan. Atalǵan faktilerdiń barlyǵy boıynsha kináli tulǵalar Qazaqstan Respýblıkasy Ákimshilik quqyqbuzýshylyq týraly kodeksiniń 196-babyna sáıkes ákimshilik jaýapkershilikke tartyldy.

Sondaı-aq zańsyz aınalymnan azamattardyń ómiri men densaýlyǵyna qaýip tóndirýi múmkin 241 dana pırotehnıkalyq buıym tárkilendi.

Eske sala keteıik, Túrkistan oblysynda pırotehnıkany durys paıdalanbaý saldarynan eki bala jaraqattandy.