Zańnyń jumys isteýi eń aldymen azamattardyń ózderine baılanysty - Baǵlan Maılybaev

ASTANA. QazAqparat - Zańnyń jumys isteýi, eń aldymen, azamattardyń ózderine baılanysty. Bul týraly búgin Bas prokýratýrada úleskerler máselesine arnalǵan alqa májilisinde QR Prezıdenti Ákimshiligi basshysynyń orynbasary Baǵlan Maılybaev málim etti, dep habarlaıdy QazAqparat.

«Memleket basshysy «Ult Josparynda» atap ótkenindeı -  «zańnyń ústemdigi  el damýynyń kepili». Bul baǵytta memleket bárin jasap jatyr. Sol turǵydan alǵanda, búgingi Bas prokýratýranyń úndeýi óte oryndy. Memlekettik organdarmen birge úkimettik emes uıymdar jáne sarapshylar zańdardy nasıhattaýǵa atsalysýy kerek. Zańnyń jumys isteýi, eń aldymen, azamattardyń ózderine baılanysty», - dep atap ótti B. Maılybaev.

Budan bólek, Prezıdent Ákimshiligi Basshysynyń orynbasary elimizde barlyq qajetti aqparat ashyq ekenin aıta kele, memlekettik organdar men ákimdikterdiń saıttary, Call-ortalyqtar jumys istep turǵanyn jetkizdi.

«Sondyqtan da zańdylyqty saqtaý tek quqyq qorǵaý organdaryna ǵana emes, sonymen qatar el turǵyndarynyń ózderine de qatysty», - dedi B. Maılybaev.