«Zańnyń ústemdigi - sybaılas jemqorlyqpen kúrestiń negizi» - respýblıkalyq basylymdarǵa sholý
ASTANA. Jeltoqsannyń 9-y. /QazAqparat/ - Qazaq aqparat agenttigi respýblıkalyq basylymdarda jeltoqsannyń 9-y, sársenbi kúni shyqqan ózekti materıaldarǵa sholýdy usynady.
Elbasy Nursultan Nazarbaev qarashanyń 13-i kúni ótkizgen tikeleı jeli kezinde túsken suraqtardan Qazaqstan Respýblıkasynyń Ekonomıkalyq qylmysqa jáne sybaılas jemqorlyqqa qarsy kúres agenttigine (qarjy polıtsııasyna) qatysty 979 azamattyń saýaly kelip tústi. Olardyń barlyǵy qarastyrylýda, al 490 saýal ıelerine jaýap jiberildi. «Egemen Qazaqstan» basylymynyń búgingi sanynda «Zańnyń ústemdigi - sybaılas jemqorlyqpen kúrestiń negizi» degen taqyryppen atalmysh suraqtarǵa Agenttik tóraǵasy Qaırat Qojamjarovtyń bergen jaýaptary jarııalanypty.
«Tulǵaly ǵalym, bilikti uıymdastyrýshy». Osy taqyryppen berilgen atalmysh basylymdaǵy kelesi maqala kórnekti ǵalym, isker basshy, respýblıka tarıhshylarynyń kósh bastaýshylarynyń biri Aqaı Núsipbekovtyń ómirine arnalypty.
Táýelsizdik merekesi qarsańynda Elbasymyz úzdik ǵalymdarymyzdyń bir tobyna ǵylym men tehnıka salasyndaǵy Qazaqstan Respýblıkasynyń 2009 jylǵy Memlekettik syılyǵyn berý týraly Jarlyqqa qol qoıǵany belgili. Osyndaı mártebeli syılyqty QR Ulttyq ıadrolyq ortalyǵynyń bas dırektory, fızıka-matematıka ǵylymdarynyń doktory, professor Qaırat Qadyrjanov bastaǵan segiz ǵalym ıelengen bolatyn. Osyǵan oraı «Egemen Qazaqstan» gazeti bıylǵy jyldyń memlekettik syılyǵyn ıelengen bul ujymdyq eńbektiń mańyzdylyǵy jaıly jáne basqada ózekti máseleler tóńireginde ujym basshysy Qaırat Kamalulymen oı bólisipti. «Atom adamǵa qyzmet etedi» degen taqyryptaǵy suhbatqa nazar aýdaryńyz.
***
Endi Qaýipsizdik keńesiniń jumysy jańasha jolǵa qoıylyp, ol usaq máselelerdi qýzaýdy toqtatatyn boldy. Onyń árbir sheshimin budan bylaı jaýapty tulǵalar men organdar sozbalańǵa salmaı, bultartpaı oryndaýǵa mindetti. Osyndaı ózgerister Elbasy Nursultan Nazarbaevtyń tóraǵalyǵymen Aqordada ótken Qaýipsizdik keńesiniń keshegi jıynynda maquldandy. Tolyǵyraq «Aıqyn» basylymynyń búgingi sanyndaǵy «Qaýipsizdik keńesiniń jumysy jandanatyn boldy» degen taqyryppen berilgen maqaladan oqı alasyzdar.
Osy taqyryp «Egemen Qazaqstan» gazetinde de keńinen jazylǵan.
«Nur Otan» HDP Almaty oblystyq fılıalynyń qoǵamdyq qabyldaýyna kelip túsken aryz shaǵym týraly aıtyp ótsek, jaǵdaı tómendegideı, 2008 jyly kelip túsken aryz - 2075 bolsa, bıyl ol eki esege artqan. Oblysta partııa qatarynan shyǵarylǵan 26 adamnyń 16-sy sybaılas jemqorlyqqa baılanysty jaýapqa tartylypty»,- dep jazǵan «Aıqyn» gazetindegi kelesi maqala «Partııadan shyǵarylǵan 26 adamnyń 16-sy jemqor» degentaqyryppen ortamyzdaǵy keleńsiz jaǵdaıǵa nazar aýdarypty.
Atalmysh basylymnyń dástúrli «Aq sóıle» aıdarymen berilgen suhbatta, QR Parlamenti Májilisiniń depýtaty Gúlmıra Isimbaeva bilim berý isi jáne onyń ózekti máseleleri tóńireginde oı órbitedi.
Sonaı-aq basylymnyń «Qazaqtyń 100 kúıi» aıdarynda berilgen maqala ótken ǵasyrda úzdik ónerimen búkil Batys Qazaqstanǵa belgili bolǵan, halyq sanasynda, mádenıet tarıhynda úlken iz qaldyrǵan kúıshi Esbaı Balustanulynyń ómirine jáne onyń «Begim saly» kúıiniń shyǵý tarıhyna toqtalypty.
