Zańnyń sııasy keppeı jatyp, ózgeris engizgen durys emes - depýtat

ASTANA. QazAqparat - QR Parlament Májilisiniń depýtaty Svetlana Bychkova zań shyǵarý jumysynyń basty kemishilikterin atady, dep xabarlaıdy QazAqparat tilshisi.

«Qazirgi reformalarǵa baılanysty biz otandyq zańnamany únemi ózgertip otyramyz. Árıne, ózgerister men tolyqtyrýlardy engizgen durys. Biraq zańdardyń kóptigi quqyqtyq qarym-qatynastardy rettep, zań ústemdigin qamtamasyz etip otyr dep aıta almaımyz. Ókinishke qaraı, osy salada júıeli jumys júrgizilmeıdi. Áli kúnge deıin tereń taldaý jasalmaıdy, qoǵamdyq pikir eskerilmeıdi, sońǵy sheshimderdiń zardabyna kásibı turǵyda baǵa berilmeıdi. Osydan keıin basymyzdy taýǵa da, tasqa da soǵyp jatamyz», - dedi S.Bychkova QR Ádilet mınıstrliginiń keńeıtilgen alqa májilisinde.

Depýtattyń aıtýynsha, zań shyǵarý jumysyn tym belsendi júrgizýdi qoıý qajet. Sebebi normatıvtik aktiler arasyndaǵy qarama-qaıshylyqtar kóbeıip keledi. Al ózekti máselelerdi sheshý sharalary keıinge qalyp jatady.

«Ashyǵyn aıtý kerek, biz sııasy keppegen zańdarǵa qaıta ózgeris engizgenimizge talaı ret kýá boldyq. Jańa zańǵa qanshama ózgerister men tolyqtyrýlardy engizdik. Biz osy «aýrýdan» áli aıyǵa almaı kelemiz. Al ózgerister nege engiziledi? Sebebi bas kezinde zańnyń ózi asyǵys qabyldandy. Sosyn sybaılas jemqorlyqqa qarsy saraptamany alyp tastaǵany durys emes. Atalǵan shara birqatar xalyqaralyq kelisimsharttarda kórsetilgen», - dep atap kórsetti S.Bychkova.