«Zańnan bıik eshkim joq»: sarapshylar «Samuryq-Qazyna» men QTJ basshylarynyń ustalýyna pikir bildirdi
ASTANA. KAZINFORM – «Samuryq» qory men oǵan enshiles QTJ basshysynyń ustalǵany týraly habardan keıin memlekettik aktıvterdi basqarýshylardyń jaýapkershiligi taǵy da talqyǵa tústi. Saıasattanýshylar bul oqıǵany bıliktiń «Zań jáne tártip» qaǵıdatyn júzege asyrýǵa kóshkeniniń belgisi dep sanaıdy.
Kvazımemleket sektordaǵy jetekshilerdiń ustalýyna oraı alǵashqylardyń biri bolyp saıasattanýshy Danııar Áshimbaev pikir bildirdi. Ol Telegram-arnasynda bul oqıǵany qor tarıhynda buryn-sońdy bolmaǵan jaǵdaı dep atady.
Ulttyq qaýipsizdik komıteti «Zań jáne tártip» saıasaty aıasynda jurt nazaryn aýdarǵan shara ótkizdi. Kvazımemlekettik sektordaǵy eń joǵary laýazymdy eki adam – «Samuryq-Qazyna» qory men «Qazaqstan temir joly» ulttyq kompanııasynyń basqarma tóraǵalary ustaldy. QTJ tarıhynda mundaı jaǵdaılar buryn da bolǵan. Al «Samuryq-Qazyna» basshysynyń ustalǵany – buryn-sońdy bolmaǵan oqıǵa, – dep jazdy saıasattanýshy.
Áshimbaevtyń aıtýynsha, bul áreket memleket sybaılas jemqorlyqqa qarsy kúreste basshylyq qyzmettegi adamnyń laýazymy men saıası yqpalyna qaramaıtynyn kórsetedi.
- Memleket jazanyń bultartpastyǵy men zań ústemdigin qamtamasyz etýge bel býǵanyn kórsetip otyr, – dep jazdy ol.
Saıasattanýshy Prezıdent Qasym-Jomart Toqaevtyń «Zań jáne tártip» qaǵıdatyn únemi uran etip júrgenin eske salady. Onyń aıtýynsha, bul ustanymnyń qaınar kózi – jańa Konstıtýtsııa. Sondaı-aq ol Prezıdent nasıhattap júrgen jasampaz patrıotızm zańsyzdyqty quptamaıtynyn aıtady.
- Barsha adamnyń quqyǵy da, mindeti de birdeı bolý kerek. «Samuryq-Qazyna» basshysy eldegi eń joǵary laýazymdardyń birin atqarady. Al qordyń ózi kóptegen mańyzdy baǵdarlamany qarjylandyrady. Memlekettiń osyndaı adamdy laýazymy men bedeline qaramastan ustaýǵa ruqsat berýi ózgelerge sabaq bolýǵa tıis, – dep atap ótti saıasattanýshy.
Saıası sholýshy Ǵazız Ábishev te «Samuryq-Qazyna» men QTJ basshylarynyń ustalýyn «Zań jáne tártip» qaǵıdatymen baılanystyrdy. Onyń pikirinshe, qoǵam memlekettik aktıvterdi basqaratyn laýazymdy tulǵalarǵa qatysty sybaılas jemqorlyqpen kúreste qatań shara qoldanylǵanyn qalaıdy.
- Memleket qazynasynan alynǵan mıllıardtaǵan dollardy basqaryp, túrli megajobany jumysynyń nátıjesi retinde nasıhattaýǵa áýes keıbir basshylardyń kútimi jaqsy, toq júzin kórgende qarapaıym adamnyń kókeıinde eriksiz kúdik paıda bolady. «Ómirdiń ózi úıretti» demekshi, mundaı adamdardyń jumysy barynsha taza ári ashyq bolýy kerek, – dep jazdy Ábishev Telegram-arnasynda.
Saıasattanýshy keıingi jyldarda «Samuryq-Qazyna» birqatar tabysty jobany júzege asyrǵanyn, basshysy da jeke tabysyn arttyrǵanyn da atap ótken.
Ǵ.Ábishev buǵan mysal retinde buqaralyq aqparat quraldarynda jarııalanǵan málimetterdi keltirdi. Buǵan deıin Nurlan Jaqypov sońǵy úsh jylda 800 mln teńge tabys tapqany belgili bolǵan edi. Saıasattanýshy mundaı tabys alatyn basshylardyń kúmán týdyratyn kez kelgen áreketten aýlaq bolýy kerektigin alǵa tartty.
- Memlekettik aktıvter senip tapsyrylǵan basshylardyń sybaılas jemqorlyq áreketterine el basshylyǵy kóz juma almaıdy dep oılaımyn, – dedi ol.
Sarapshy bul oqıǵany sybaılas jemqorlyqpen kúrestegi jańa ustanymnyń belgisi dep baǵalady. Onyń pikirinshe, quqyq qorǵaý organdary memleket qarjysyna qol suqqan árbir adamdy jaýapqa tartýy kerek.
- Jalpy, basqa jol joq. Memlekettik shyǵyndardy qysqartyp, bıýdjet kirisin arttyrý mindeti turǵan kezde sybaılas jemqorlyqpen ustalǵandarǵa qatań shara qoldaný ǵana eldiń alǵa jyljýyna múmkindik beredi, – dep túıindedi Ǵazız Ábishev.
UQK «Samuryq-Qazyna» men QTJ basshylary ustalǵanyn rastaǵanyn jazǵan edik.
