Zańnamalyq ózgeris: Deklaratsııa tapsyrýdan birqatar azamat bosatylady
ASTANA. KAZINFORM – Budan bylaı bankter quny 78,6 mln teńgeden asatyn múlik alǵan azamattar jaıly derekti salyq organdaryna joldaýǵa mindetti bolady. Odan bólek, 250.00 jáne 270.00 nysan boıynsha deklaratsııa tapsyrýdan birqatar azamat bosatylady.
Kúni keshe Memleket basshysy Qazaqstannyń keıbir zańnamalyq aktilerine turǵyn úı-kommýnaldyq sharýashylyq, kásipkerlik jáne eksporttyq-kredıttik agenttiktiń qyzmeti máseleleri boıynsha ózgerister men tolyqtyrýlar engizetin Zańǵa qol qoıdy. Túzetýlerdiń ekinshi blogy salyq zańnamasyna engizilgen ózgeristerge baılanysty. Atap aıtqanda deklaratsııalaý máselelerinde quqyqtyq aıqyndyqty arttyrýǵa jáne Salyq kodeksiniń erejelerine silteme normalardy ózektendirýge baǵyttalǵan. Memlekettik kirister komıteti Kazinform agenttiginiń suraýy boıynsha naqty qandaı normalar engizilgenin jáne ol azamattarǵa qandaı jańa mindetter júkteıtinin túsindirdi.
Deklaratsııa tapsyrýdaǵy jeńildikter men jańa talaptar
Qazaqstanda jeke tulǵalardyń kiristeri men múlkin jalpyǵa birdeı deklaratsııalaý júıesin engizý 2021 jyldan 2025 jylǵa deıin tórt kezeńde júzege asyrý kózdelgen.
Qazirgi tańda, jalpyǵa birdeı deklaratsııalaýdyń úsh kezeńi aıasyndaǵy jalpy júıege 4,8 mln adam kirdi, onyń ishinde memlekettik qyzmetshiler, kvazımemlekettik sektor qyzmetkerleri, bıznes ókilderi jáne olardyń jubaılary bar.
2025 jyly tórtinshi kezeń sheńberinde deklaratsııa tapsyrý mindettemesi jeke qurylymdarda jumys isteıtin qyzmetkerlerge, zeınetkerlerge, úı sharýasyndaǵy áıelderge, stýdentterge jáne basqa da tulǵalarǵa júktelgen bolatyn. Bul shamamen 8 mıllıon adamdy qamtıtyn edi.
Memlekettik kirister komıteti Jeke tulǵalardyń kiristerin ákimshilendirý basqarmasynyń bas sarapshysy Ersaıyn Kóptileýulynyń aıtýynsha, Salyq Kodeksiniń jalpyǵa birdeı deklaratsııalaý bóligine engizilgen ózgeristerge saı endi deklaratsııa tapsyrý mindetinen biraz adam bosatylady.
- Úkimet Memleket basshysynyń Aýyl sharýashylyǵy qyzmetkerleri I forýmynda bergen tapsyrmasyn oryndaý maqsatynda jalpyǵa birdeı deklaratsııalaý tásilderin qaıta qaraý arqyly deklaratsııalaýdyń tórtinshi kezeńine jatatyn azamattardy deklaratsııa (aktıvter men mindettemeler týraly) tapsyrýdan bosatýdy usyndy, biraq shetelde aktıvteri bar azamattar bul mindetten bosatylmaıdy, - deıdi ol.
Sarapshynyń aıtýynsha, aktıvter men mindettemeler týraly deklaratsııany (250.00 nysan) tapsyrýǵa myna tulǵalar mindetti:
- Qazaqstan Respýblıkasynan tys jerde múlki bar Qazaqstan Respýblıkasynyń azamattary jáne rezıdentteri;
- Saılanbaly memlekettik laýazymdarǵa, sondaı-aq olarǵa teńestirilgen laýazymdarǵa kandıdattar;
- Tsıfrlyq aktıvteri bar Qazaqstan Respýblıkasynyń azamattary men rezıdentteri;
- Jeke praktıkamen aınalysatyn adamdar.
Osy sanattarǵa jatpaıtyn jeke tulǵalar 250.00 nysan boıynsha deklaratsııany tabystaýdan bosatylady.
Sonymen qatar ol myna sanattaǵy adamdar kirister men múlik týraly deklaratsııany (270.00 nysan) tapsyrýǵa mindetti ekenin atap ótti:
- Memlekettik qyzmetshiler men olarǵa teńestirilgen tulǵalar (kvazımemlekettik sektor uıymdarynyń basshylary men quryltaıshylaryn qosa alǵanda), sondaı-aq olardyń jubaılary;
- Bankterdiń, baǵaly qaǵazdar naryǵynyń, saqtandyrý uıymdarynyń iri qatysýshylary jáne olardyń jubaılary;
- Kommertsııalyq uıymdardyń basshylary men quryltaıshylary (qatysýshylary, daýys beretin aktsııalarynyń úlesi 10%-dan asatyn aktsıonerlik qoǵamdarda) jáne olardyń jubaılary;
- Jeke praktıkamen aınalysatyn adamdar;
- Qazaqstan Respýblıkasynan tys jerlerde múlki bar adamdar;
- Derbes salyq salýǵa jatatyn tabys tapqan tulǵalar (dara kásipkerlerdiń kiristerin qospaǵanda);
- 1 000 aılyq eseptik kórsetkishten (AEK) asatyn somada sheteldik bankterde aqshalaı qarajaty bar tulǵalar;
- Quny 20 000 AEK-ten asatyn iri múlikti Qazaqstan Respýblıkasynyń aýmaǵynda da, odan tys jerlerde de satyp alǵan tulǵalar.
Osylaısha, 270.00 nysan boıynsha deklaratsııany tapsyrýdan kórsetilgen sanattarǵa jatpaıtyn jeke tulǵalar bosatylady. Tıisinshe, atalǵan deklaratsııalardy usynýǵa mindetti jeke tulǵalardyń sany azaıady.
Bankter qymbat múlik alǵandardyń deregin salyq organdaryna beredi
Spıkerdiń aıtýynsha, qymbat múlik alǵan adamdar 270.00 nysan boıynsha deklaratsııa usynýǵa mindetti bolady.
«Salyq jáne bıýdjetke tólenetin basqa da mindetti tólemder týraly» QR Kodeksiniń (Salyq kodeksi)jalpyǵa birdeı deklaratsııalaý bóligine, atap aıtqanda 633-babyna engizilgen ózgeristerge sáıkes, esepti salyq kezeńi ishinde Qazaqstan Respýblıkasynda jáne odan tys jerlerde quny 20 000 aılyq eseptik kórsetkish mólsherinen asatyn múlik satyp alǵan jeke tulǵalar kirister men múlik týraly deklaratsııa (270.00 nysan) tapsyrýǵa mindetteledi:
- memlekettik tirkeýge jatatyn mehanıkalyq kólik quraldary men tirkemeler;
- zańdy tulǵanyń jarǵylyq kapıtalyndaǵy qatysý úlesteri;
- baǵaly qaǵazdar;
- týyndy qarjy quraldary (oryndalýy bazalyq aktıvti satyp alý nemese ótkizý jolymen júzege asyrylatyn týyndy qarjy quraldaryn qospaǵanda);
- turǵyn úı qurylysyna qatysý úlesi;
- ınvestıtsııalyq altyn.
- Bul rette salyq tóleýshi deklaratsııada 20 000 AEK-ten asatyn múlikti satyp alýǵa arnalǵan shyǵystardy jabý kózderi týraly málimetterdi de kórsetedi, - deıdi ol.
Sonymen qatar sarapshy endi qymbat múlik alǵandar jaıly derekter bankterden memlekettik organǵa túsip otyratynyn atap ótti.
- Salyq kodeksine engizilgen ózgeristerge sáıkes, ekinshi deńgeıli bankter bir jyl ishinde quny 20 000 AEK (78 640 000 tg) mólsherinen asatyn múlikti satyp alǵan jeke tulǵanyń bank shottaryndaǵy aqsha qozǵalysy týraly málimetterdi usynýǵa mindetti. Atalǵan málimetter negizinde satyp alýdy júzege asyrǵan jeke tulǵanyń kirisi men shyǵysyna taldaý júrgiziledi. Bul óz kezeginde, Memlekettik kirister organdaryna salyǵy tólenbegen kiristerdi anyqtap, ákimshilendirýge múmkindik beredi, - dedi Ersaıyn Kóptileýuly.
Eske sala keteıik, jalpyǵa birdeı deklaratsııalaýdyń ekinshi kezeńine jatatyn qazaqstandyqtar 270.00 nysan boıynsha kirister men múlik týraly deklaratsııany 15 qyrkúıekke deıin tapsyrýy tıis.
«Ulttyq aqparattyq tehnologııalar» AQ baspasóz qyzmetiniń habarlaýynsha, muny eGov.kz portaly jáne eGov Mobile qosymshasy arqyly onlaın rejımde jasaýǵa bolady.
Deklaratsııany memlekettik qyzmetshiler, bıýdjettik uıymdar men kvazımemlekettik sektordyń qyzmetkerleri, sondaı-aq olardyń jubaılary tapsyrýǵa mindetti. Eseptilik aktıvter men mindettemeler týraly «kiris» deklaratsııasy (250.00 nysan) tapsyrylǵannan keıin usynylady.