Zańnamalyq ókilettikter tolyǵymen Quryltaıdyń quzyretinde qalady — Azat Perýashev
ASTANA. KAZINFORM — Jańa Konstıtýtsııa jobasynda Prezıdent pen Quryltaı arasyndaǵy ókilettikter jetkilikti deńgeıde teńgerimdi túrde bólingen. Bul týraly Konstıtýtsııalyq reforma jónindegi komıssııanyń VII otyrysynda Májilis depýtaty Azat Perýashev málimdedi.
Onyń aıtýynsha, bul másele 2025 jylǵy qazanda Prezıdenttiń 8 qyrkúıektegi Joldaýyn iske asyrý aıasynda qurylǵan parlamenttik reforma jónindegi jumys tobynyń arnaıy otyrysynda jan-jaqty qaralǵan. Sol kezde Prezıdent pen Parlament ókilettikterin naqty ajyratý boıynsha birqatar ustanym ázirlengen.
Depýtat jańa Konstıtýtsııa jobasynda Prezıdent respýblıkanyń eń joǵary laýazymdy tulǵasy retinde zań shyǵarýshy, atqarýshy jáne sot bıligi tarmaqtarynyń úılesimdi jumys isteýin qamtamasyz etetinin atap ótti.
— Prezıdent pen Quryltaı arasyndaǵy ózara is-qımyldy saıası monopolııany nyǵaıtý retinde baǵalaý qate. Bul halyq aldyndaǵy jaýapkershilik ınstıtýty men bılik tarmaǵy arasyndaǵy qatynas, — dedi A.Perýashev.
Onyń sózinshe, Konstıtýtsııa jobasy qandaı da bir bılik tarmaǵyn kúsheıtýdi nemese álsiretýdi kózdemeıdi. Kerisinshe, ókilettikterdi neǵurlym teń ári úılesimdi bólýge baǵyttalǵan jańa saıası júıe qalyptastyrylady.
Sonymen qatar qoǵam múddesin bildirý fýnktsııalary Halyq keńesin qurý arqyly keńeıtilip, Quryltaı kásibı zań shyǵarý qyzmetine shoǵyrlanady. Zańnamalyq ókilettikter tolyǵymen Quryltaıdyń quzyretinde qalady.
Depýtattyń aıtýynsha, Prezıdentke beriletin qosymsha ókilettikter daǵdarystyq jaǵdaılardyń aldyn alý, quqyqtyq olqylyqtar men retteýshi vakýýmǵa jol bermeý maqsatynda qarastyrylǵan.
— Qoldanystaǵy rásimder Quryltaıǵa búkil el úshin mindetti zańdardy qabyldaýǵa ǵana emes, keıbir jaǵdaılarda Prezıdenttiń qarsylyǵyn eńserýge de múmkindik beredi, — dedi ol.
Osylaısha, Parlamenttiń joǵary zań shyǵarýshy organ retindegi róli saqtalady, al usynylyp otyrǵan ózgerister qazirgi zaman talaptary men ulttyq múddelerdi eskere otyryp, quqyqtyq retteýdi jetildirýge baǵyttalǵan.
Aıta keteıik Memlekettik keńesshi qazirgi Konstıtýtsııa men jańa Konstıtýtsııanyń aıyrmashylyqtaryn atady.
