Zańnamalardyń jańartylýyna baılanysty birqatar normatıvtik qaýlylardyń zańdyq kúshi joıyldy - Joǵarǵy Sot
Joǵary sot organynyń tóraǵasy Qaırat Mámı otyrysty asha kele, qatysýshylardyń nazaryn Joǵarǵy Sot qyzmetiniń mańyzdy baǵyttarynyń biri retinde norma shyǵarmashylyq qyzmetke aýdardy.
«Jalpy otyrys sot tóreligin iske asyrýy kezinde respýblıka sottarynyń zańdylyqty saqtaý máselelerin qaraıdy, sot praktıkasyn zerdeleý men jınaqtaýdyń qorytyndylary boıynsha normatıvtik qaýlylar qabyldaıdy, sot praktıkasy máseleleri boıynsha túsindirmeler beredi jáne zańnamany jetildirý jóninde usynystar engizedi. Dál osy fýnktsııalar bizdiń jumysymyzda basymdyqqa ıe bolýy tıis», - dedi Q.Mámı.
Qazaqstan Respýblıkasy Prezıdenti bekitken Qylmystyq zańnyń jáne qylmystyq sot óndirisiniń jańa modeline, jetildirilgen ákimshilik quqyq buzýshylyq týraly zańnamaǵa jáne qylmystyq jazalardy atqarý júıesine kóshý jónindegi biryńǵaı memlekettik is-qımyl josparyna sáıkes, Qylmystyq, Qylmystyq protsestik, Qylmystyq atqarý jáne Ákimshilik quqyqbuzýshylyqtar jónindegi kodeksterdiń jańa redaktsııalarynyń qabyldanýyna baılanysty Joǵarǵy Sot normatıvtik qaýlylarǵa monıtorıng júrgizýdi aıaqtady.
Joǵaryda atalǵan jumystyń qorytyndysy boıynsha jalpy otyrysta azamattyq-quqyqtyq, qylmystyq-quqyqtyq jáne ákimshilik quqyqtyq qatynastardyń jekelegen salalaryndaǵy zańnamany qoldanýǵa qatysty qaýlylarǵa ózgerister men tolyqtyrýlar engizýdi qarastyratyn normatıvtik qaýlylar qaralyp, qabyldandy.
Atap aıtqanda, sot bıligi týraly zańnamany qoldaný, sot isin júrgizý ashyqtyǵy qaǵıdatyn saqtaý, sot aktileriniń oryndalýyn qamtamasyz etý, memlekettik qajettilik úshin jer ýchaskelerin májbúrlep ıelikten aıyrý týraly zańnamany qoldaný, sottardyń alqabılerdiń qatysýymen qylmystyq ister boıynsha is júrgizýdi retteıtin zańnamany qoldaný jáne basqa da máseleler boıynsha túzetýler engizildi. Zańnamanyń jańartylýyna baılanysty birqatar normatıvtik qaýlylardyń zańdyq kúshi joıyldy dep tanyldy.
Joǵarǵy Sot Memleket basshysynyń Sýdıalardyń VI sezinde Sot jıýrıi qyzmetiniń basymdylyǵyn qaıta qaraý týraly bergen tapsyrmasyn oryndaý maqsatynda Sot jıýrıi reglamentine ózgerister men tolyqtyrýlar engizdi.
«Qazaqstan Respýblıkasynyń sot júıesi men sýdıalarynyń mártebesi týraly» Konstıtýtsııalyq zańǵa sáıkes Joǵarǵy Sottyń jalpy otyrysy prezıdıýmynyń reglamenti bekitildi.
Q.Mámı Prezıdıým sot qyzmetin jetildirý jónindegi sharalardy iske asyrýdyń jańa tásilderin qamtamasyz etetindigine senim bildirip, Prezıdıým múshelerin tıimdi jáne nátıjeli jumys atqarýǵa shaqyrdy.
