Zańnamaǵa «ulttyq tsıfrlyq obekt» uǵymy engiziledi

ASTANA. KAZINFORM — Qazaqstanda eGov sııaqty memlekettik tsıfrlyq júıe men halyqqa elektrondy negizde qyzmet kórsetetin platformalarǵa «ulttyq obekt» mártebesin berilýi múmkin. Bul atalǵan tsıfrlyq aktıvterdiń jeke menshikke, basqa elge satylyp ketýinen, ıeligine ótip ketýden qorǵaıdy. 

Bul týraly Májilis minberinen Tsıfrlyq kodeks jobasyn tanystyrǵan depýtat Ekaterına Smyshlıaeva aıtty.

— Elimizde alǵash ret ıelikten shyǵarýǵa jatpaıtyn jáne eldiń tsıfrlyq egemendiginiń negizin quraıtyn ulttyq tsıfrlyq obektiler uǵymy bekitilmekshi, — dedi ol.

Kodeks jobasy kez kelgen memlekettik nemese iri tsıfrlyq júıeniń jumys sapasyn úsh túrli tekserý arqyly qadaǵalap otyrýdy kózdeıdi. Olar:

— Fýnktsıonaldyq aýdıt. Bul tekserý tsıfrlyq júıeniń o basta qurylǵan maqsatyna qanshalyqty saı jumys istep turǵanyn tekseredi.

— Kıberqaýipsizdik aýdıti — júıeniń hakerler shabýylyna tózimdiligin, derekterdiń qorǵalýyn tekseredi.

— Retteýshi aýdıt — júıedegi protsesterdiń Tsıfrlyq kodeks talaptaryna sáıkestigin qaraıdy.

Aıta ketý kerek, osy kodeksti qabyldaý arqyly tsıfrlyq derekterdi zań júzinde múlik retinde moıyndaý usynylyp otyr.