Zańnamaǵa turǵyn úı qurylysyn naqty shaǵymsyz-aq tekserý múmkindigin beretin ózgerister enýi múmkin

NUR-SULTAN. QazAqparat – Qoldanystaǵy zańnamaǵa turǵyn úı qurylysyn naqty shaǵymsyz-aq tekserý múmkindigin beretin ózgerister enýi múmkin. QR Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynda atalmysh zań jobalary týraly málimet berdi, dep habarlaıdy QazAqparat tilshisi.

«Qoldanystaǵy zańnamaǵa sáıkes memlekettik sáýlet-qurylys baqylaý organdaryn shaǵymsyz tekserý múmkin emes. Al qurylys kezeńinde shaǵymdardyń túsý yqtımaldyǵy tómen jáne memlekettik sáýlet-qurylys baqylaý organdary obektilerdi paıdalanýǵa qabyldaýǵa qatyspaıdy.

Qurylys salýshylar baqylaýdyń nashar ekenin baıqap otyr, sondyqtan obektiler qurylys kemshilikterimen paıdalanýǵa qabyldanady», - degen Qaıyrbek Óskenbaev memlekettik baqylaýdy kúsheıtý úshin shuǵyl sharalardy qamtıtyn zań jobasy ázirlengenin atady.

Olar:

1. Aýmaqta qurylys salýdy sapasyz josparlaýdy boldyrmaý maqsatynda qala qurylysy saraptamasyn engizý;

2.Qurylystyń barlyq kezeńderinde (qazanshuńqyr qazýdan bastap abattandyrý jumystaryna deıin) obektilerge josparly baqylaýdy engizý jáne memlekettik sáýlet-qurylys baqylaý organdarynyń obektilerdi paıdalanýǵa qabyldaýǵa qatysýy;

3. Paıdalanylatyn materıaldar men oryndalǵan jumystardyń sapasyna zerthanalyq jáne tehnıkalyq tekserý júrgizý úshin táýelsiz memlekettik zerthanalyq qyzmetti qurý.