Zańnamaǵa kásipkerlik qyzmet máseleleri boıynsha túzetýler engizildi
ASTANA. QazAqparat - Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine azamattyq, banktik zańnamany jetildirý jáne kásipkerlik qyzmet úshin jaǵdaıdy jaqsartý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.
Qazaqstan Respýblıkasynyń 2010 jyldan 2020 jylǵa deıingi kezeńge arnalǵan quqyqtyq saıasat tujyrymdamasyn iske asyrý aıasynda ázirlengen zań jobasy Salyq, Azamattyq jáne Azamattyq-protsestik kodeksterge, «Zańdy tulǵalardy memlekettik tirkeý jáne fılıaldar men ókildikterdi eseptik tirkeý týraly», «Qyzmetker eńbek (qyzmettik) mindetterin atqarǵan kezde ony jazataıym oqıǵalardan mindetti saqtandyrý týraly», «Jyljymaly múlik kepilin tirkeý týraly» jáne «Baǵaly qaǵazdar rynogy týraly» zańdarǵa túzetýler engizýdi kózdeıdi.
Úlestik menshikti ıemdený, paıdalaný jáne oǵan ıelik etý máselelerindegi azamattardyń quqyqtary men zańdy múddelerin qamtamasyz etý maqsatynda zań jobasymen múlikti belgilengen tártipte bólý múmkin bolmaǵan kezde ony ashyq saýdada satý týraly sot sheshimderin qabyldaý jóninde ımperatıvtik normalar belgilenedi. Zań jobasynyń negizgi jańalyǵy azamattyq mámilelerdi daýlanatyn jáne mánsiz dep bólýdi zańnamalyq reglamentteý bolyp tabylady.
Komıtettiń keńeıtilgen otyrysynda «Qazaqstan Respýblıkasynyń Úkimeti men Polsha Respýblıkasynyń Úkimeti arasyndaǵy Adamdardyń readmıssııasy týraly kelisimdi ratıfıkatsııalaý týraly» zań jobasy da qaraldy.
2016 jylǵy 22 tamyzda Varshavada jasalǵan kelisim zańsyz mıgratsııaǵa qarsy is-qımyl salasyndaǵy ekijaqty yntymaqtastyq máselelerin retteıdi.
Qujatta ýaǵdalasýshy taraptardyń aýmaǵyna zańsyz kelgen, onda bolǵan nemese turyp jatqan Qazaqstan men Polsha azamattarynyń, úshinshi memleketter azamattarynyń nemese azamattyǵy joq adamdardyń readmıssııasynyń quqyqtyq jáne uıymdastyrýshylyq máselelerin reglamentteıdi. Kelisim erejeleri qaıtarylatyn adamdardy anyqtaýdyń jáne olardyń qaýipsiz tranzıtiniń tetikterin retteıdi, tegin jol júrý qujattaryn berý tártibin, jedeldetilgen readmıssııany qoldaný sharttaryn aıqyndaıdy.
Zań jobalary Palatanyń qaraýyna jiberildi.
