Zańnamaǵa etıl spırti men alkogol óniminiń óndirilýin retteý máseleleri boıynsha túzetýler engiziledi - Senat
ASTANA. 26 mamyr. QazAqparat - Búgin Qazaqstan Respýblıkasy Parlamenti Senaty Qarjy jáne bıýdjet komıtetinde «Qazaqstan Respýblıkasynyń keıbir zańnamalyq aktilerine etıl spırti men alkogol óniminiń óndirilýin jáne aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasy qaraldy.
Zań jobasy Memleket basshysynyń tapsyrmasyna sáıkes, sondaı-aq Qazaqstan Respýblıkasynda kóleńkeli ekonomıkaǵa qarsy is-qımyldyń 2013-2015 jyldarǵa arnalǵan Іs-sharalar josparyn júzege asyrý maqsatynda ázirlengen bolatyn.
Zań jobasy etıl spırti men alkogol óniminiń óndirilýi jáne aınalymy protsesinde týyndaıtyn quqyqtyq qatynastar salasyndaǵy qatysýshylarǵa yqpal etý tetigin jetildirýge baǵyttalǵan. Zań jobasymen usynylyp otyrǵan normalar spırttik ishimdikterdi satý oryndary men ýaqytyn shekteýge, alkogol ónimin óndirý jáne saýdalaý sharttaryn qatańdatýǵa, etıl spırti men alkogol óniminiń óndirilýi jáne aınalymy salasyndaǵy buzýshylyq úshin jaýaptylyqty qatańdatýǵa baǵyttalǵan.
Zań jobasymen etıl spırti men alkogol óniminiń óndirý kólemin jańǵyrtylǵan esepteýshi aspaptaryn engizý, alkogol naryǵynyń sýbektileri men tutynýshylardyń esepke alý-baqylaý markalaryn sáıkestendirý múmkindikterin belgileý, etıl spırti men alkogol ónimin óndirýdiń eń tómengi shegin belgileý arqyly memlekettik baqylaýdy kúsheıtý kózdelip otyr. Sonymen birge, zań jobasy zańnamada belgilengen talaptardy buza otyryp qyzmetin júzege asyratyn alkogol naryǵy sýbektilerin qysqartýǵa baǵyttalǵan. Jobada olar boıynsha jaýaptylyq kúsheıtildi.
Tujyrymdamalyq turǵyda maquldanǵan zań jobasy Palata qaraýyna jiberildi.
