Zańnamaǵa áıel quqyǵy men balalardyń qaýipsizdigine qatysty mańyzdy túzetý engizildi – sarapshy
ASTANA. KAZINFORM – Uzaq talqylaýlardyń nátıjesinde zańnamaǵa áıel quqyǵy men balalardyń qaýipsizdigin qamtamasyz etýge baǵyttalǵan mańyzdy túzetý engizildi. Bul týraly QR Prezıdenti janyndaǵy Qazaqstannyń strategııalyq zertteýler ınstıtýtynyń jetekshi sarapshysy Gúlmıra Toqanova málim etti.
«Prezıdent Qasym-Jomart Toqaev otbasynda, kóshede, qoǵamdyq kólikte nemese ınternette jasalǵan zorlyq-zombylyq pen agressııadan áıelder men balalardyń quqyǵyn qamtamasyz etýge jáne qorǵaýǵa baǵyttalǵan zańdarǵa qol qoıdy. Engizilgen jańa normalar birneshe áleýmettik mańyzdy mindetterdi oryndaýy tıis. Bul rette, qylmystyń aldyn alý, jazanyń bultartpastyǵy jáne zardap shekkenderge qoldaý kórsetý ınfraqurylymyn kúsheıtý eskerilgen. Máselen, endi uryp-soǵý qylmystyq quqyq buzý áreketi retinde sıpattalady. Sondyqtan 80 AEK-ke deıin aıyppul salynady nemese 25 táýlikke deıin qamaýǵa alynady. Densaýlyqqa qasaqana jeńil zııan keltirgeni úshin 200 AEK aıyppul nemese 50 táýlikke deıin qamaqqa alý jazasy qarastyrylǵan, ıaǵnı ákimshilik jaza emes, qylmystyq jaýapkershilik bolady», - dedi G. Toqanova.
Onyń paıymynsha, kámeletke tolmaǵandarǵa qatysty zorlyq-zombylyq pen qatygezdik qylmystar boıynsha taraptardyń tatýlasý múmkindigin joqqa shyǵaratyn tarmaq óte mańyzdy túzetý boldy.
«Osy jáne basqa da zańnamalyq jańalyqtar jeke tulǵalarǵa qarsy qylmystardyń aldyn alýǵa, azamattardyń quqyǵyn qorǵaýǵa arnalǵan. Áıelder men balalardy zorlyq-zombylyqtan qorǵaýdyń kelesi qadamy zań talaptaryn tıisti deńgeıde júzege asyrýǵa qatysty. Osyǵan baılanysty quqyq qorǵaý organdarynyń jumysyna qoǵam jaǵynan erekshe nazar aýdarylady dep oılaımyn. Sonymen qatar quqyqtyq baqylaý júıesine qoǵamdyq uıymdar, BAQ jáne janashyr azamattar tartylǵan. Bul túzetýler azamattyq qoǵam, sarapshylar jáne Úkimet arasyndaǵy uzaq talqylaýlar men syndarly ózara is-qımyldyń nátıjesi bolǵany kezdeısoq emes», - dedi sarapshy.
Onyń aıtýynsha, barlyq qoǵamdyq talqylaý men pikirtalastar, sondaı-aq Prezıdenttiń turmystaǵy zorlyq-zombylyq pen balalarǵa qatysty zorlyq-zombylyq úshin jazany qataıtý týraly tapsyrmasy mańyzdy áleýmettik máselege jaýap retinde boldy. Sondyqtan elimizde qabyldanyp jatqan zańdar qoǵamda durys qarym-qatynasty nyǵaıtýǵa baǵyttalǵan.
Aıta keteıik, Prezıdent áıel quqyǵy men balalardyń qaýipsizdigin qamtamasyz etetin zańdarǵa qol qoıdy.
