Zańnama talaptaryn saqtamaǵan munaı ónimderin ótkizetin kásiporyndar anyqtaldy
ASTANA. 18 qazan. QazAqparat - Munaı ónimderin ótkizýge baılanysty jalpy somasy 280 mln. teńgege jýyq qarjyny quraıtyn sáıkestik sertıfıkatynsyz, tehnıkalyq reglamentterge saı kelmeıtin 117 ónim toptamasyn ótkizýge tyıym salyndy.
Bul týraly búgin Astanada 9 aıdaǵy memlekettik qadaǵalaý qorytyndysyna arnalǵan brıfıngte QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıtetiniń tóraǵasy Ryskeldi Sátbaev aıtty.
Onyń sózine qaraǵanda, jalpy elimiz boıynsha munaı ónimderin ótkizetin kásiporyndarǵa 153 tekserý júrgizilgen. Onyń ishinde 78-inde zańnama talaptaryn buzý faktileri anyqtaldy.
Belgili bolǵandaı, munaı ónimderin ótkizý barysynda sáıkestik sertıfıkatynsyz, tańbalaýǵa qoıylatyn talaptardy saqtamaı ótkizý, sondaı-aq salystyryp tekserilmegen ólshem quraldaryn paıdalaný jaǵdaılary men janar-jaǵarmaıdyń sapa kórsetkishteri boıynsha kóptegen sáıkessizdik faktileri oryn alǵan. Osy oraıda elimizdiń birqatar jaǵarmaı quıý beketterinde atalǵan zań buzýshylyqtar anyqtaldy.
