Zańnama talaptaryn buzǵan memlekettik organdardyń 521 laýazymdy qyzmetkeri jaýapkershilikke tartyldy
ASTANA. QazAqparat - Bıyl Bas prokýratýranyń Quqyqtyq statıstıka jáne arnaıy esepke alý jónindegi komıteti tekserý júrgizýde memlekettik baqylaý jáne qadaǵalaý týraly zańnama talaptary múltiksiz saqtalýyn qadaǵalaýdy qamtamasyz etýge baǵyttalǵan jumystaryn jalǵastyrdy.
«Aǵymdaǵy jylǵy 9 aıda ótken jyldyń osy merzimimen salystyrǵanda jalpy tirkelgen tekserýler sany 21 paıyzǵa (73 565-ten 89537-ge) artty. Sondaı-aq, bıznes sýbektilerin tekserý 40 paıyzǵa (28 387-den 39 983-ke) ósti. Mundaı ósim shaǵyn jáne orta bıznesti tekserýge ótken jylǵy moratorııge baılanysty bolyp otyr», - delingen atalǵan komıtettiń habarlamasynda.
Tekseriletin sýbektilerdiń qyzmetine zańsyz aralasýdan qorǵaý maqsatynda komıtet 740 tekserý taǵaıyndaý aktisin tirkeýden bas tartty, onyń ishinde 362-si jeke kásipkerlerge qatysty. 462 zańsyz tekserý anyqtaldy, onyń ishinde 204-si jeke kásipkerlerge qatysty.
Tekserýdi tirkeýden bas tartýdyń basym bóligi tutynýshylardyń quqyqtaryn qorǵaý (171), salyq qyzmeti (91), ákimdik (68), eńbek ınspektsııasy organdaryna (61), tótenshe jaǵdaılar (60), jer qatynastary (59), veterınarlyq baqylaý jáne qadaǵalaý basqarmalaryna (53) qatysty qoldanylǵan.
«Atalǵan merzimde memlekettik baqylaý jáne qadaǵalaý týraly zańnamanyń talaptaryn buzǵany úshin qoldanylǵan prokýrorlyq sharalarmen memlekettik organdardyń 521 laýazymdy adamy zańmen qaralǵan jaýapkershilikterge tartylǵan», - dep atap ótilgen Quqyqtyq statıstıka jáne arnaıy esepke alý jónindegi komıteti málimetinde.
