Zangezýr dálizi mindetti túrde salynady – Ázerbaıjan prezıdenti
ASTANA. KAZINFORM – Ázerbaıjan prezıdenti Ilham Álıev XXXI Baký energetıkalyq forýmynyń resmı ashylý saltanatynda sóılegen sózinde Zangezýr dálizi mindetti túrde salynatynyn málimdedi, dep habarlaıdy Anadolý agenttigi.
Ázerbaıjannyń memlekettik buqaralyq aqparat quraldarynyń habarlaýynsha, memleket basshysy eldiń temirjol jáne avtomobıl ınfraqurylymyna ınvestıtsııa sala otyryp, jańa kólik dálizderin ashyp jatqanyn atap ótti.
Sondaı-aq Ilham Álıev Shyǵys-Batys dáliziniń tabysty jumys istep turǵanyn eske saldy.
– Shyǵys-Batys dáliziniń taǵy bir tarmaǵyna aınalatyn Zangezýr dálizi AQSh prezıdenti, Armenııa premer-mınıstri jáne meniń aramyzda 2025 jylǵy 8 tamyzda Aq úıde qol qoıylǵan qujatqa sáıkes mindetti túrde salynady, – dedi Ázerbaıjan prezıdenti.
Memleket basshysy sondaı-aq álemniń qazba otynynsyz ómir súre almaıtynyn aıtty.
– Barlyǵymyz klımatty jaqsartyp, planetany saqtap qalǵymyz keledi. Barlyǵymyz ekologııalyq turǵydan qolaıly ortada ómir súrgimiz keledi. Biraq búgin biz óte pragmatıkalyq ári shynaıy bolýymyz kerek. Bolashaqty energetıkalyq qaýipsizdik turǵysynan josparlap, sonymen qatar jańartylatyn energııa kózderine ınvestıtsııa salýymyz qajet, – dedi Ilham Álıev.
Onyń aıtýynsha, Ázerbaıjannyń jahandyq energetıkalyq qaýipsizdikke qosatyn úlesi aldaǵy ýaqytta arta túsedi.
Prezıdent aqylǵa qonymdy energetıkalyq saıasattyń arqasynda Ázerbaıjannyń endi shetelge ınvestıtsııa sala alatynyn atap ótti.
– Osydan otyz jyl buryn biz ınvestorlardy tartatynbyz. Qazir óz ınvestıtsııalarymyzdy shetelge baǵyttap otyrmyz. Búginde bizdiń SOCAR memlekettik munaı kompanııasy Taıaý Shyǵys, Afrıka jáne Ortalyq Azııa elderine ınvestıtsııa salyp jatyr. Bul geografııa aldaǵy ýaqytta keńeıe beredi, – dedi Ázerbaıjan prezıdenti.
Ilham Álıev qazirgi ýaqytta Ázerbaıjannyń energetıkalyq kabelder tartý máselesi boıynsha seriktesterimen tyǵyz yntymaqtastyq ornatyp otyrǵanyn da aıtty.
Ol Qara teńiz energetıkalyq kabeli Ázerbaıjannan Grýzııaǵa, odan ári Qara teńiz arqyly Rýmynııaǵa, Majarstanǵa jáne basqa da elderge deıin tartylatynyn atap ótti.
Sonymen qatar Ázerbaıjan–Grýzııa–Túrkııa–Bolgarııa baǵytyndaǵy qurlyqtyq elektr jetkizý jelisi jobasy da iske asyrylyp jatqanyn jetkizdi.
Aıta keteıik, Almaty qalasy ákiminiń orynbasary Bakýde ótken forýmda ekologııalyq jobalaryn tanystyrdy.
