Zańgerler Prezıdenttikke úmitkerlerdiń naýqanǵa óz qaltasynan qansha qarjy shyǵyndaı alatynyn aıtty
Birlestik ókili, professor Marat Sársembaev Prezıdenttikke úmitkerlerdiń saılaý naýqanyna qarjy shyǵyndaý boıynsha qandaı shekteýler qoıylatynyn atady.
«Eger Prezıdenttikke kandıdat óziniń qarjyna is-sharalar ótkizetin bolsa, shyǵarylatyn materıaldar sanyna, ótkiziletin is-sharalarǵa arnaıy shekteýler joq. Biraq jalpy qarjy kólemi boıynsha belgili bir shekteýler bar. Saılaý týraly konstıtýtsııalyq zańǵa sáıkes, kandıdattyń naýqanǵa shyǵyndaıtyn óz qarajaty nemese usynǵan respýblıkalyq qoǵamdyq birlestik bólgen qarajat 510 mln teńgeden aspaýy kerek. Bul eń tómengi eńbekaqy mólsheriniń 12 myń esesine teń. Al el azamattary men uıymdary kandıdattyń saılaý naýqanyn erikti qaıyrmaldyq negizinde qarjylandyrsa, jalpy soma eń tómengi eńbekaqy mólsheriniń 15 myń esesinen aspaýy kerek. Bul aqshaǵa shaqqanda 637,5 mln teńge» - deıdi Marat Sársembaev.
Zańgerdiń aıtýynsha, respýblıkalyq bıýdjet esebinen jabylatyn 7 331 200 teńgeniń shyǵysy tómendegi sheńberden shyqpaýy tıis.
«Kandıdat saılaýaldy baǵdarlamasyn teledıdar arqyly baıandaýǵa 5 250 000 teńgeden artyq shyǵyndaı almaıdy. Al radıo arqyly baıandaý 200 myń teńgeden aspaýy tıis. Merzimdi baspa nemese jelilik basylymdarǵa jarııalaý kólemi 810 myń teńgeden artylmaýy qajet», - deıdi «Zańgerler - ádil saılaý úshin» respýblıkalyq qoǵamdyq birlestiginiń ókili.
