Zańgerler qaýymy Táýelsizdiktiń 30 jylynda atqarylǵan sharýalardy talqylady
«Táýelsizdiktiń 30 jyldyǵy – quqyqtyq júıeniń damýy» degen taqyryppen ótken jıynǵa QR Parlament depýtattary, Ulttyq qoǵamdyq senim keńesiniń músheleri, memlekettik organdar men halyqaralyq uıym ókilderi, tanymal qoǵam qaıratkerleri men belsendiler, zańgerler men ǵalymdar, Respýblıkalyq notarıat palatasy men Jeke sot oryndaýshylary palatasynyń ókilderi, Respýblıkalyq konsýltanttary alqasy men Sot sarapshylary palatasynyń ókilderi, úkimettik emes uıymdar qatysty.
Respýblıkalyq zań keńesshileri alqasynyń tóraǵasy Serik Aqylbaı Qazaqstannyń halyqaralyq quqyq pen halyqaralyq qatynastardyń derbes sýbektisine aınalǵanyna bıyl 30 jyl tolǵanyn eske salyp, osy jyldar ishinde Qazaqstan halyqaralyq arenada abyroıly, órkendegen, damyp kele jatqan elge aınalǵanyn atady.
«Táýelsiz memleketti damytý úshin jańa quqyqtyq júıe qajet edi. Memlekettik basqarý qyzmetin zaman talabyna saı beıimdep, azamattyq qoǵamdy, halyqaralyq qatynastardy damytý úshin, ekonomıkany alǵa bastyrý úshin jan-jaqty saraptalǵan zańnama kerek boldy. Reformalar júrgizýge qajet zańnamalyq baza qalyptastyrý jumysy qarqyndy júrdi. Bul kezeńde quqyqtyq memleket quryp, zań ústemdigin qamtamasyz etetin konstıtýtsııalyq qaǵıdattar bekitildi», - dedi zańger.
Onyń paıymynsha, Qazaqstannyń quqyqtyq júıesi álemdegi úzdik ǵylymı standarttardy basshylyqqa ala otyryp, tabandap damyp keledi. Al 1995 jyly qabyldanǵan jańa Konstıtýtsııa memlekettiliktiń saıası, ekonomıkalyq, mádenı, quqyqtyq negizin aıqyndaǵan.
«Prezıdent Qasym-Jomart Toqaev bul jumystardyń bárin «Estıtin memleket» prıntsıpine baǵyttap jatyr. Qoǵamda ádilet ornatyp, tıimdi memleket qalyptastyrý onyń basty ustanymy bolyp otyr. Memleket pen azamattyq qoǵamnyń ózara birlesken áreketi arqyly quqyqtyq saıasat pen quqyq qorǵaý júıesiniń tıimdiligin arttyrýǵa basa kóńil bólinip keledi. Táýelsizdiktiń 30 jyldyǵy ekonomıkalyq, saıası reformalardyń aıasynda, tsıfrlandyrý men múgedek balalardyń quqyǵyn qorǵaý jumystary basym baǵytqa aınalǵan kezeńge dóp kelip otyr», - degen quqyqtanýshy búgingi tańda memleket pen qoǵam ómirinde quqyqtyń róli artyp kele jatqanyn tilge tıek etti.
«Prezıdent zań shyǵarý protsesin jańa sapalyq deńgeıge kóterý týraly mindet qoıyp otyr. Azamattyq qoǵam ókilderin normashyǵarmashylyq potseske tartý asa mańyzdy. Qazirgi kezde quqyqtyq bilim berý men quqyqtyq nasıhatty, quqyqtyq mádenıetti jetildirý ózekti», - dedi Serik Aqylbaı.