Zańgerler daıarlaý isinde qordalanǵan problemalar bar – Senat tóraǵasy

ASTANA. KAZINFORM – Zań salasyndaǵy mamandardyń sany bar da sapasy joq. Bul týraly Senat tóraǵasy Máýlen Áshimbaev málim etti.

- Búgin biz parlamenttik tyńdaý aıasynda elimizde zań bilimin damytý jáne zań shyǵarý qyzmetiniń sapasyn arttyrý máselelerin talqylaımyz. Kásibı zańgerlerdiń biliktilik deńgeıi qoǵam men memlekettiń barlyq salasyna tikeleı áser etetini belgili. Osyndaı bilikti mamandardy daıyndaý úshin zań bilimin damytý asa mańyzdy. Ózderińizge belgili, Prezıdent Qasym-Jomart Toqaev bilim berý máselesine únemi basa mán berip keledi. Qazirgi tańda bilimi men ǵylymy joǵary deńgeıde damyǵan memleket qana qýatty jáne básekege qabiletti bola alatyny anyq. Memleket basshysy óz Joldaýynda atap ótkendeı, búginde otandyq bilim men ǵylym salasynyń aldynda mańyzdy mindetter tur. Bul sala árdaıym ýaqyt talabyna beıimdelip, únemi tyń jańalyqtar usynyp otyrýǵa tıis, - dedi M. Áshimbaev Senattaǵy zań qyzmetteriniń kadrlyq áleýetin nyǵaıtý jáne zań bilimin damytý taqyrybyna arnalǵan parlamenttik tyńdaýda.

Bul turǵyda Senat tóraǵasy elimizde Memleket basshysynyń bastamasymen keshende reformalar iske asyp jatqanyn eske saldy. Osy oraıda qolǵa alynǵan barlyq bastamany zańnamalyq turǵydan sapaly ári ýaqytyly qamtamasyz etý ortaq mindet sanalady. Bilikti zańgerlersiz tıisti maqsattarǵa qol jetkizý, jalpy quqyqtyq memleket qurý múmkin emes ekeni belgili.

- Sondyqtan atalǵan sala mamandary qashanda erekshe suranysqa ıe. Zańgerliktiń álemdegi bedeldi mamandyqtardyń biri sanalýynyń da basty sebebi sol. Soǵan qaramastan, qazir elimizde zańgerler daıarlaý isinde qordalanǵan problemalar bar ekenin moıyndaý qajet. Solardyń biri – jumys berýshilerge qajetti mamandar men oqý bitirgen jas mamandardyń sany arasynda sáıkessizdiktiń bolýy. Sondaı-aq, eńbek naryǵynda bilikti zańgerlerdiń jetispeýi de ózekti másele. Búginde zań salasyndaǵy mamandardyń kólemi boljamdy suranystan toǵyz ese joǵary bolyp otyr. ıAǵnı, mamandardyń sany bar da, sapa joq dep aıtsaq, artyq bolmas. Oǵan eshkim renjimes. Osy máseleni júıeli jolǵa qoıý úshin naqty tetikterdi qolǵa alýymyz kerek. Sonymen qatar, quqyqtyq bilim berý isinde ınnovatsııalyq tájirıbeler men tásilderdi engizýdiń de bereri mol ekeni sózsiz. Osy baǵytta da keshendi sharalar qajet dep esepteımiz, - dedi ol.

M. Áshimbaevtyń paıymynsha, bul rette protsesterdi tsıfrlandyrýǵa jáne jasandy ıntellekt tehnologııalaryn qoldanýǵa basa mán bergen jón. Qazir damyǵan elder osy máselelerge kóńil bólip otyr. Mysaly, byltyr AQSh zań mektepteriniń jartysynan kóbi jasandy ıntellekt kýrstaryn usynǵan eken. Sondaı-aq, atalǵan elde oqý oryndarynyń 80 paıyzdan astamynda stýdentterge jasandy ıntellekt tetikterin tájirıbede tıimdi qoldanýdy úıretetin qajetti resýrstar bar.

- Sonymen qatar, reformalardyń jańa kezeńinde sot jáne quqyq qorǵaý júıelerinde bilikti qyzmetkerlerdiń jańa býynyn qalyptastyrý da asa mańyzdy dep esepteımiz. Mundaı qadam zańdylyq pen quqyqtyq tártip qaǵıdatyn qoǵamda berik ornatýǵa jáne azamattardyń memlekettik bılikke degen senimin arttyrýǵa yqpal etetini sózsiz. Kadr daıarlaý máselesi quqyqtyq aktiler men zań jobalaryn ázirleý sapasyna da tikeleı áser etetinin esten shyǵarmaýymyz kerek. Bul salada da biraz problemalar bar ekeni belgili, - dedi Senat tóraǵasy.

Buǵan deıin Qazaqstanda zańgerlik keńes berý úshin jasandy ıntellekt ázirlenip jatqanyn jazǵan edik.