Zańgerler daıarlaý sapasyna talapty kúsheıte túsý qajet - I. Merkel
ASTANA. QazAqparat - Elimizde zańgerler daıarlaý sapasyna talapty kúsheıte túsý qajet. Búgin Parlament Májilisinde zańgerlik qyzmetterdi retteý máselesine arnalǵan «dóńgelek ústel» jıynynda Bas prokýror orynbasary Iogan Merkel osyndaı pikir aıtty.
Sóz arasynda ol halyqaralyq tájirıbelerge súıene otyryp, zańgerler daıarlaýǵa talapty qataıta túsýdiń qajettigin alǵa tartady. «Álemde túrli úlgiler barshylyq. Máselen, Germanııany alyp qarasaq, zańgerler belgili bir quqyq qorǵaý organynda 6 aı jumys istep, sosyn emtıhan tapsyrady. Sosyn jáne alty aı basqa organda (máselen sotta) istep, qaıta synaqtan ótedi. Osylaısha, árbir kezeńder saıyn emtıhan jalǵasyp, maman jetilip otyrady, al eger ol emtıhannan súrinip jatsa, zańger bola almaıdy degen sóz. Bul shyndyǵynda zańgerler úshin qatań talap, biz de osyndaı túrdegi qatań talaptarǵa kóshýimiz kerek sekildi», - dedi I.Merkel.
Onyń sózine qaraǵanda, qazaqstandyq qana emes, halyqaralyq, álemdik naryqtaǵy zańgerlik qyzmetter aıasynda básekege túse alatyn zańgerlerdiń kadrlyq rezervterin qalyptastyrý jumysyna eń birinshi kezekte bilim sapasy áser etedi. «Sondyqtan da, álemdik tájirıbelerdiń ozyq úlgilerimen jumys jasaý kerek. Zańgerler daıarlaýdyń túrli úlgilerin keńinen talqylap, engizýdiń mańyzy joǵary», - dedi I.Merkel.
