Zańger: Jańa Konstıtýtsııa jobasy Qazaqstannyń beıbitshilik tujyrymdamasyn jalǵastyrady
ASTANA. KAZINFORM — Elimiz Táýelsizdik alǵaly beri beıbitshilik ustanymynan aınyǵan emes. Jańa Ata zań jobasy da — osy joldyń jalǵasy. Bul týraly zańger Nurǵazy Ánýarbekov «Referendým-2026» onlaın marafony barysynda aıtty.
— Jańa Konstıtýtsııa jobasynyń preambýlasynda «beıbitshilikke jáne barlyq elmen dostyqqa umtylyp» degen joldar bar. Bul beıbitshilikti basqa memlekettermen yqpaldasa otyryp, qamtamasyz etetinimizdi kórsetedi. Sońǵy jyldarda Qazaqstan álemde «orta derjava» retinde tanyla bastady. Bul — Halyqaralyq arenada beıbitsúıgishtik is-áreketimizdi kórsete alǵanymyzdyń nátıjesi. Jańa Konstıtýtsııa jobasy osy baǵytty jalǵastyratynymyzdy kórsetedi, — dedi maman.
Sondaı-aq, ol jańa Ata zań jobasynyń 73-babyna toqtaldy. Onda Konstıtýtsııalyq Sot «halyqaralyq sharttardy ratıfıkatsııalaǵanǵa deıin olardyń Konstıtýtsııaǵa sáıkestigin qaraıdy» jáne «halyqaralyq uıymdar men olardyń organdary sheshimderiniń oryndalýynyń Konstıtýtsııaǵa sáıkestigin qaraıdy» degen tarmaqtar bar. Nurǵazy Ánýarbekovtiń sózinshe, bul tarmaqtardyń mańyzy zor.
— Bolashaqta biz qabyldaıtyn halyqaralyq mindettemeler osy jańa Konstıtýtsııanyń normalaryna sáıkes kelýi kerek. Aldaǵy ýaqytta bolýy múmkin jaıttardy eskerip, osyndaı mehanızmder engizilýi qajet. Mundaı tájirıbe Germanııa, Ispanııa tárizdi Eýropa elderinde bar. Bul — kerek mehanızm. Óıtkeni, tejeýshi emes, aldyn alýshy qyzmetin atqarady, — dep túıindedi zańger.
Aıta keteıik, buǵan deıin Quryltaı depýtattarynyń sany emes, sapasy mańyzdy ekeni jónindegi sarapshy pikirin jarııalaǵan edik.
