Zańger páter alarda neni eskerý keregin aıtty

ASTANA. KAZINFORM — Páter satyp alý kezinde yqtımal táýekelderden saqtaný úshin azamattar qurylys kompanııasynyń qujattaryn muqııat tekserýi qajet. Bul týraly zańger Bekarys Amınov túsindirdi.

— Qurylys kompanııalary keıde úlestik qurylys shartynyń ornyna ınvestıtsııa nemese bron shartyn usynady. Alaıda zańnama boıynsha salynyp jatqan nysanǵa tek úlestik qurylys sharty jasalýy kerek. Onyń arnaıy bekitilgen nysany bar, — deıdi maman Jibek Joly telearnasyndaǵy «Bugin LIVE» baǵdarlamasynda.

Zańgerdiń aıtýynsha, úlesker kompanııanyń barlyq qujatyn talap etýge tolyq quqyly. BSN boıynsha aqparatty ınternetten jáne Turǵyn úı portalynan tekserýge bolady. Onda qurylys kompanııasynyń lıtsenzııasy, salynyp jatqan nysandary jáne jaýapkershilikke tartylǵan kompanııalar týraly málimet kórsetiledi.

Úlestik qurylysqa ruqsat beretin úsh negiz bar: 

1. Jergilikti atqarýshy organnyń úleskerlerden aqsha tartýǵa bergen ruqsaty.

2. «Qazaqstan turǵyn úı kompanııasynyń» kepildigi.

3. Ekinshi deńgeıli bankterdiń súıemeldeýi arqyly jasalǵan qujat.

— Osy úsh qujattyń bireýi bolmasa, úlestik qurylys shartyna qol qoıýǵa bolmaıdy. Bul talaptar azamattardyń quqyǵyn qorǵaýǵa baǵyttalǵan, — deıdi Bekarys Amınov.

Mamannyń aıtýynsha, keıbir kompanııa qurylysqa daıyn bolmaı turyp, qarjy jınaýǵa tyrysady. Ekonomıkalyq jaǵdaıdy durys boljaı almaý nemese qarajattyń jetispeýshiligi úıdiń aıaqtalmaı qalýyna ákelýi múmkin.

Quqyqtyq daýlar kóbine shart talaptaryn durys tirkemegennen týyndaıdy. Eger qurylys merzimi keıinge shegerilse jáne shartta aıyppul kózdelgen bolsa, azamat sotqa júginip, shyǵyndy óndirip ala alady.

Sonymen qatar, páterdi qabyldaý kezinde aýdany kishireıip shyqsa, qurylys salýshy qosymsha shart jasap, aıyrmashylyqty kórsetýge tıis. Mundaı jaǵdaıda da sotqa júginýge bolady.

Aıta keteıik, buǵan deıin Qyzylordada sáýlet-qurylys salasyndaǵy zańnama talaptaryn buzǵandarǵa 127 mln teńge aıyppul salynǵanyn jazǵan edik.