Zańger mamandyǵyn meńgergen senatorlar kerek - Máýlen Áshimbaev

ASTANA. QazAqparat – Senat tóraǵasy Máýlen Áshimbaev palata jumysyna zańger mamandyǵyn meńgergen senatorlar kerek ekenin aıtty, dep habarlaıdy QazAqparat tilshisi.

Búgin Senattyń jalpy otyrysynan keıin tilshiler palata tóraǵasynan aldaǵy saılaý aıasynda bolashaqta qandaı senatorlar kerek bolatynyn surady.

«Bizge zańgerler kerek. Parlamentte óte kóp kúrdeli zańdar qaralyp jatyr. Búgin qabyldanǵan bankrottyq týraly zań da osyndaı qujattardyń sanatynda. Sondyqtan mundaı qıyn zańdardy pysyqtap, talqylaý úshin bizge bilikti zańgerler kerek. Aldaǵy saılaý nátıjesi boıynsha bizge myqty mamandar keledi degen oıdamyn», - dedi Máýlen Áshimbaev.

Budan buryn habarlanǵandaı, 2023 jyldyń 14 qańtarynda ótetin Senat depýtattaryn saılaý aıasynda óńirlerden qatysatyn kandıdattardyń aty-jónderi belgili boldy.

Aıta keteıik, bıyl qarasha aıynda Memleket basshysy Qazaqstan Respýblıkasy Parlamenti Senatynyń depýtattaryn saılaýdy 2023 jylǵy 14 qańtarǵa taǵaıyndaý týraly Jarlyqqa qol qoıdy.

Foto: senate.parlam.kz