Zańger elektrosamokat júrgizýshilerine qoıylatyn jańa talaptardy túsindirdi
ASTANA. KAZINFORM – Elektrosamokat qala ishinde qatynaýdyń jyldam ári yńǵaıly quralyna aınalǵanymen, ony paıdalaný erejesin buzý máselesi áli de ózekti. Jibek Joly telearnasyndaǵy «Búgin.LIVE» baǵdarlamasynda zańger Arjan Sádýaq samokat júrgizýshileri úshin mańyzdy talaptardy túsindirdi.
2025 jyly Almatyda elektrosamokattarǵa qatysty 386 jol-kólik oqıǵasy tirkelip, 400-den astam adam zardap shekken. Al jol qozǵalysy erejesin buzǵan samokat júrgizýshilerine qatysty 24 myńnan astam ákimshilik hattama toltyrylǵan. Osyǵan baılanysty elektrosamokattardy paıdalanýǵa qatysty talaptar kúsheıtilip otyr.
Zańgerdiń aıtýynsha, ózgeristerdiń biri elektrosamokattardy sáıkestendirýge qatysty. Budan bylaı ár samokatqa jeke nómir berilýi qarastyrylyp otyr. Bul jol-kólik oqıǵasy nemese quqyqbuzýshylyq bolǵan jaǵdaıda kólik quralyn jáne onyń paıdalanýshysyn anyqtaı alady.
– Buǵan deıin samokattarǵa nómir berilmeıtin. Sondyqtan qandaı da bir jaǵdaı bolǵan kezde sol samokatty paıdalanýshyny anyqtaý qıyn edi. Endi ár samokatqa nómir berý qarastyrylyp otyr, – dedi zańger.
Maman samokattardyń qozǵalys jyldamdyǵyna da nazar aýdardy. Onyń aıtýynsha, jyldamdyqty shekteý talaptary kúsheıtiledi. Sonymen qatar jaıaý júrginshilerge arnalǵan trotýarda samokatpen júrýge bolmaıdy.
– Trotýarda samokatpen júrýge tyıym salynǵan. Ol jerden samokatty qolmen túsirip, jaıaý alyp ótý kerek. Al velosıped pen samokattarǵa arnalǵan arnaıy jolaqtar bolsa, sol jolaqpen júrý mindetti. Eger belgilengen talaptardy saqtamasa, bul ákimshilik quqyqbuzýshylyq retinde sanalady, aıyppul 10 AEK-ten bastalady, – dedi Arjan Sádýaq.
Zańgerdiń sózinshe, mundaı talaptyń kúsheıýine jaıaý júrginshilerdiń qaýipsizdigi de sebep bolyp otyr. Sebebi samokattardyń trotýarda júrýi adamdardy qaǵyp ketý nemese jaraqattaý jaǵdaılaryna ákelýi múmkin.
Eger alǵashqy ret ereje buzǵan adam eshkimge qaýip tóndirmese, aýyzsha eskertý jasalýy múmkin. Al jaıaý júrginshilerge qaýip tóndirgen jaǵdaıda ákimshilik jaýapkershilik qarastyrylady.
Mamannyń aıtýynsha, samokat júrgizýshisine qoıylatyn talap onyń kólik quralynyń jeke menshikte nemese jalǵa alynǵanyna qaramastan birdeı qoldanylady. Sondaı-aq jolǵa shyǵatyn adamda júrgizýshi kýáligi bolýy jáne qaýipsizdik talaptaryn saqtaýy kerek.
Elektrosamokatty paıdalaný kezinde jolaýshy tasymaldaýǵa da jol berilmeıdi, ıaǵnı bir samokatta bir ǵana adam bolýy kerek.
Zańger kámeletke tolmaǵandardyń jaýapkershiligine de toqtaldy. Onyń aıtýynsha, quqyqbuzýshylyq jasaǵan adamnyń jasyna qaraı jaýapkershilik máselesi qarastyrylady. 16 jastan bastap azamattyń ózi jaýap bere alady, al odan kishi jastaǵy balalardyń quqyqbuzýshylyǵy úshin ata-anasy jaýapty.
Aıta keteıik, elektrosamokattarǵa qatysty birqatar talap 25 tamyzdan bastap qoldanylýy josparlanǵan.
