Zańger Burhan Janseıitovti qamaýda ustaý merzimi 1 aıǵa uzartyldy

ASTANA. QazAqparat – Zańger Burhan Janseıitovke qatysty tergeý amaldaryna baılanysty ony qamaýda ustaý merzimi 10 mamyrǵa deıin uzartyldy, dep habarlaıdy QazAqparat tilshisi Almaty qalalyq sotynyń baspasóz qyzmetine silteme jasap.

«Almaty qalasy mamandandyrylǵan aýdanaralyq tergeý sotynyń 2023 jylǵy 7 sáýirdegi habarlamasy boıynsha sot qaýlysymen sotqa deıingi tergep-tekserý organynyń ótinishhaty qanaǵattandyryldy. J.-ǵa qatysty qylmystyq is materıaldarymen tanysý kezeńinde qamaýda bolý merzimin 1 aıǵa, ıaǵnı 2023 jylǵy 10 mamyrǵa deıin uzartýǵa sanktsııa berildi», - delingen resmı habarlamada.

Eske salsaq, ótken jyldyń 15 shildesinde Qarjy monıtorıngi agenttigi advokat Býrhan Janseıitov quqyq qorǵaý organdarynyń jumysyna kedergi keltirgeni úshin qamaýǵa alynǵanyn habarlady.

17 shildede «qamaýda ustaý» túrindegi bultartpaý sharasynan bas tartylyp, ol «úıqamaqqa» aýystyryldy.

Sol kúni respýblıkalyq advokattar alqasy B. Janseıitovke qatysty málimdeme jasady.