Zańger: Ata zań kirispesi – jastar úshin myqty tárbıe quraly

ASTANA. KAZINFORM – Konstıtýtsııalyq reforma jónindegi komıssııanyń búgingi otyrysynda E.Bóketov atyndaǵy Qaraǵandy ýnıversıtetiniń rektory Nurlan Dýlatbekov jańartylatyn Konstıtýtsııanyń kirispesindegi ózgeshelikterdi tárbıe quraly retinde baǵalady.

– Pedagog retinde aıtsam, Konstıtýtsııanyń kirispesi – óskeleń urpaqqa baǵdar. Olar qandaı qundylyqtar bizde basym degen suraqqa jaýap tabady. Ata zań kirispesi – ásirese jastar úshin myqty tárbıe quraly. Biz Konstıtýtsııanyń tek jalań mátinder jıyntyǵy emes, is júzinde oryndalatyn basty qujat retindegi mán-maǵynasyn, mańyzyn asha túsýimiz qajet, - dedi zań ǵylymdarynyń doktory.

Sondaı-aq ol Konstıtýtsııa memlekettiń syrtqy saıasattaǵy bedeline de áser etetin qujat ekenin eske saldy. 

– Zań men tártip qaǵıdasy, birtutastyq, yntymaq, etnosaralyq kelisim, mádenıet, bilim, ǵylym ıdeıalary bekitilgen kirispeniń jalpy logıkasyna sáıkes keledi jáne úndesip jatyr. Ádiletti Qazaqstan jáne Zań men tártip uǵymdary osy qundylyqtardyń praktıkalyq baǵytyn kúsheıtedi jáne olardy naqty memlekettik saıasatpen baılanystyrady. Biz qazir eń mańyzdy tarıhı sáttemiz. Quqyq júıesiniń turaqtylyǵy, qoǵamnyń senimi jáne elimizdiń halyqaralyq bedeli qabyldanatyn basty zańnyń sapasyna baılanysty bolmaq, - dedi rektor.

Eske salaıyq, Konstıtýtsııalyq komıssııanyń V otyrysyn Kazinform agenttiginiń resýrstarynan kórýge bolady. 

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.