Zańǵar Nurlanuly Mysyrdaǵy jarysta sensatsııa jasap, shırek fınalǵa shyqty
ASTANA. KAZINFORM — Qazaqstandyq tennısshi, 17 jastaǵy Zańǵar Nurlanuly Sharm-el-Sheıh (Mysyr) ITF M15 týrnıriniń shırek fınalyna joldama aldy.
Buǵan deıin osy dodada eresekter arasynda alǵash ret jeńiske jetken qazaqstandyq tennısshi ekinshi aınalymda álemniń 811-inshi, jarystyń tórtinshi raketkasy, taılandtyq, 30 jastaǵy Vıshaııa Trongcharoenchaıkýlmen sheberlik baıqasty.
Zańǵar birinshi partııada aıqyn basymdylyq tanytty – 6:1.
Ekinshi sette de sol qarqynynan tanǵan joq – 6:3.
Osylaısha, sensatsııa jasaǵan Zańǵar Nurlanulynyń shırek fınaldaǵy qarsylasy keıin anyqtalady.
Z.Nurlanuly juptyq synda da shırek fınalda óner kórsetedi. Ol reseılik, 18 jastaǵy Artem Bogomolovpen birge bastapqy kezdesýinde ıtalııalyqtar Lýsıano Barbarıno – Baltazar Hýsty oısyrata utty – 6:1, 6:1.
Sonymen qatar Zańǵardyń qaryndasy, 12 jastaǵy Raıana Nurlanqyzy Aýstrııadaǵy ekinshi sanattaǵy Tennis Europe týrnırin sátti ótkizýde. Ol irikteý saıystarynan bastap, qazirdiń ózinde jartylaı fınalǵa deıin jetti.
Raıana shırek fınalda Aýstrııanyń 12 jasqa deıingiler arasynda ekinshi raketkasy Nora Výkotıchti qapy qaldyrdy – 6:3, 6:1.
Eske sala keteıik, budan buryn 17 jastaǵy Zańǵar Nurlanulynyń eresekter arasynda alǵashqy jeńisine qol jetkizgenin jazǵan edik.