Zańǵar Nurlanuly ITF Juniors týrnırindegi jetinshi jekeleı tıtýlyn jeńip aldy

ASTANA. KAZINFORM — Koreıanyń Vondjý qalasynda 18 jasqa deıingi tennısshiler arasyndaǵy Azııanyń beıresmı chempıonaty sanalyp kelgen bedeldi ITF Juniors týrnıri (J300 sanaty) máresine jetti, dep habarlaıdy QTF baspasóz qyzmeti.

Qazaqstandyq tennısshi Zańǵar Nurlanuly (ITF Juniors reıtınginde 23-orynda) álemdik jasóspirimder tennısindegi úzdik oıynshylardyń biri ekenin taǵy bir márte dáleldedi.

Fınalda 18 jasqa deıingi qazaqstandyq birinshi raketka Qytaı Taıbeıiniń ókili — Kýan Cheý Chenmen (álemdik reıtıngte 41-orynda) kezdesti. Buǵan deıin qos sportshy 2024 jyly kúzde ótken jasóspirimder arasyndaǵy Devıs Kýbogynyń fınaldyq kezeńinde kezdesip, sol kezde Nurlanuly 7:6, 6:2 esebimen jeńiske jetken edi.

Zańǵar bul joly match bastala salysymen basymdyq tanytty. Ol qarsylasyna múmkindik qaldyrǵan joq. Qazaqstandyq tennısshi kezdesýdi 6:2, 6:1 esebimen qorytyndylady.

Bul jeńis Nurlanulynyń hard tósenishindegi qatarynan ekinshi tıtýly boldy. Ol aldyńǵy aptada Koreıanyń basqa qalasy — Chhýnchhonda ótken J200 týrnırinde de jeńimpaz atanǵan edi. Osylaısha, Zańǵardyń hardtaǵy jeńisti serııasy 11 matchqa deıin jalǵasty.

Osyǵan deıin Ústel tennısinen Qazaqstan quramasynyń ókili Alan Qurmanǵalıev Qytaıdyń Beıjiń qalasynda ótip jatqan China Youth Smash týrnırinde qola júldege ıe boldy.