Zańǵar Nurlanuly Almaty Open týrnırinde álemniń 72-raketkasynan jeńildi
ASTANA. KAZINFORM — Qazaqstandyq tennısshi Zańǵar Nurlanuly ATP 250 sanatyndaǵy Almaty Open týrnıriniń negizgi kezeńindegi alǵashqy kezdesýin ótkizdi.
ATP álemdik reıtınginde 1308-orynda turǵan 18 jastaǵy qazaqstandyq sportshy uıymdastyrýshylardyń arnaıy shaqyrtýymen (wild card) negizgi kezeńge qatysý múmkindigin aldy. Onyń qarsylasy álemdik reıtıngte 72-orynda turǵan chehııalyq Tomash Mahach boldy.
Chehııalyq tennısshi otandasymyzdy 6:2, 6:0 esebimen jeńdi. Match 1 saǵat 3 mınýtqa sozyldy.
Oıyn barysynda Nurlanuly tájirıbeli qarsylasynyń joǵary qarqynyna tótep berýge tyrysty. Mahach segiz eıs jasap, segiz breık-poınttyń altaýyn sátti paıdalandy.
Qazaqstandyq tennısshi alty vınner jasap, 15 qos qatelik jiberdi jáne tórt breık-poınttyń bireýin paıdalandy.
Eske salaıyq, Zańǵar Nurlanuly Almaty Open týrnıriniń juptyq synyna da qatysyp, Qazaqstannyń birinshi raketkasy Aleksandr Býblıkpen birge óner kórsetti.
