Zańǵa qaıshy áreketke barǵan balalardy áleýmettik ońaltý júıesin zańmen jańǵyrtý talap etiledi
ASTANA. QazAqparat - Zańǵa qaıshy áreketke barǵan balalardy áleýmettik ońaltý júıesin zańmen jańǵyrtý talap etiledi. Bul týraly búgin elordada ótken zańǵa qaıshy áreketke barǵan balalarǵa arnalǵan arnaıy bilim berý mekemelerin reformalaý máselesi boıynsha dóńgelek ústel otyrysynda aıtyldy.
«Qazaqstanda zańǵa qaıshy áreketke barǵan kámelettik jasqa tolmaǵandardy áleýmettik ońaltýdyń qoldanystaǵy júıesi bar. Biraq, bul júıe jańǵyrtýdy jáne bul sanatqa jatatyn balalardy ońaltý tetikterin qarastyrýdy talap etedi», - dedi QR BǴM Balalar quqyqtaryn qorǵaý jónindegi komıteti tóraıymynyń mindetin atqarýshy M.Ábdikárim.
Onyń atap ótýinshe, bul másele osy jyldyń 2 naýryzy kúni QR Premer-Mınıstriniń orynbasary D.Nazarbaevanyń tóraǵalyǵymen ótken selektorlyq rejimdegi otyrysta kóterilgen.
«Bizge bul máseleni qarstyryp, qoldanystaǵy júıeni zerdeleý tapsyryldy. Eger qajettilik bolsa, arnaýy bilim berý uıymdaryn reformalaýdyń tujyrymdamasy ázirlenedi», - dedi ol.
Jıynǵa QR memlekettik organdardyń ókilderi, Reseı, Qyrǵyzstan, Grýzııa memlekettik emes uıymdarynyń sarapshylary qatysýda.
