Zańǵa qaıshy kontent taratqan strımerlerdi kim anyqtaıdy
ASTANA. KAZINFORM – Mádenıet jáne aqparat mınıstrligi tikeleı efırlerdegi zańǵa qaıshy kontentti anyqtap, ony joıý boıynsha sharalar qabyldaıdy. Al efır avtorlarynyń jeke basyn anyqtaý jáne olardyń áreketterine quqyqtyq baǵa berý quqyq qorǵaý organdarynyń quzyretine jatady. Bul týraly Quryltaı depýtattarynyń saýalyna Mádenıet jáne aqparat birinshi vıtse-mınıstri Qanat Ysqaqovtyń jaýabynda aıtylǵan.
Onyń aıtýynsha, mınıstrlik áleýmettik jeliler men onlaın-platformalardy qosa alǵanda, aqparattyq keńistikke turaqty monıtorıng júrgizedi. Zańnama talaptarynyń buzylǵany anyqtalǵan jaǵdaıda, vedomstvo quqyqtyq den qoıý sharalaryn qabyldaıdy.
Atap aıtqanda, quqyqqa qaıshy materıaldardy joıý úshin onlaın-platformalardyń ıelerine habarlamalar, al buqaralyq aqparat quraldarynyń ıelerine eskertý hattar joldaıdy. Eger bul talaptar oryndalmasa, materıaldar men ınternet-resýrstarǵa qoljetimdilik sot tártibimen nemese zańda belgilengen tártippen shektelýi múmkin.
Osyǵan baılanysty tikeleı efırler avtorlaryn sáıkestendirý jáne olar týraly qajetti málimetterdi alý tıisti quqyq qorǵaý organdarynyń suraý salýy negizinde zańnamada belgilengen tártippen júzege asyrylady.
Osylaısha, mnıstrlik aldaǵy ýaqytta da onlaın-platformalardyń ákimshilikterimen birlesip quqyqqa qaıshy materıaldardy joıý jáne Qazaqstan Respýblıkasynyń zańnamasyna qarsy keletin, sondaı-aq adamdardyń quqyqtary men zańdy múddelerin buzatyn aqparattyń taralýyna jol bermeý boıynsha jumysty jalǵastyrady.
Aıta keteıik, bıyl 10 aıda ınternet keńistiginde balaǵat sózder men balalarǵa zııandy aqparattardyń 592 faktisi anyqtaldy.
