Zańǵa engizilgen túzetý: Azamattyq hal aktilerin kez kelgen aımaqta tirkeýge bolady
NUR-SULTAN. QazAqparat – Endi qazaqstandyqtar azamattyq hal aktileriniń barlyǵyn turǵylyqty tirkeý ornyna qaramastan, kez kelgen jerden ala alady. Bul týraly zańǵa engizilgen túzetýler búgin Parlament Senatynda qabyldanǵan zań jobasynda qarastyryldy, dep habarlaıdy QazAqparat.
Jańashyldyq balanyń týýyna, nekeni tirkeý men ajyrasýǵa, aty-jóni men tegin ózgertýge, qaıtys bolý qujattaryn tirkeý sııaqty qyzmetterdi qamtıdy.
Eske salaıyq, buryn azamattar atalǵan memlekettik qyzmetterdi alý úshin turǵylyqty tirkeý orny nemese tirkeý jazbasynyń ornalasqan jeri boıynsha memlekettik korporatsııanyń front-ofısterine nemese AHAT bólimine habarlasatyn. Endi azamattyq hal aktilerine qatysty 5 túrli qyzmetti kez kelgen HQO-dan nemese AHAT-tan alýǵa bolady. Bul kerekti qujattardy az ýaqyt ishinde alýǵa jáne sybaılas jemqorlyq derekterin boldyrmaýǵa múmkindik beredi.
«Buryn qujattardy rásimdep alý úshin ótinish berýshi tirkeý orny boıynsha halyqqa qyzmet kórsetý ortalyqtaryna nemese tirkeýshi organǵa habarlasyp, 5-ten 30 kúnge deıin jaýap kútetin, bul qyzmet alýshylar úshin qolaısyzdyq pen qosymsha qaǵazbastylyqty týdyratyn. Máselen, eger azamat bir aımaqta tegin ózgertý týraly ótinish bildirse, memlekettik organ ózge aımaqtan – onyń týǵan jerinen qosymsha málimetterdi suratatyn. Tıisinshe, qyzmet kórsetý ýaqyty uzaratyn», – dedi «Azamattarǵa arnalǵan úkimet» memlekettik korporatsııasynyń basqarma tóraıymy Ásemgúl Baltasheva.
Jalpy, zańǵa usynylǵan túzetýlerdiń 70% memlekettik qyzmetterdi ońtaılandyrý men avtomattandyrýǵa múmkindik beredi. Elektrondyq formatqa kóshý qujattardy qabyldaý ýaqyty men olardyń sanyn qysqartady, ákimshilik kedergilerdi joıady jáne qyzmetterdi alý protsesin jeńildetedi.
