Zańǵa engizilgen ózgeristerge baılanysty boryshker sot oryndaýshyǵa ózi kelip jolyǵýǵa múddeli bolady - E. Shalabaev
ASTANA. QazAqparat - Jyl basynan beri sot oryndaýshylary sottyń qaraýyna kelmegeni úshin 1400 boryshkerdi ákimshilik jazaǵa tartý isterin sotqa joldady.
Qazaqstan Respýblıkasy Ádilet mınıstrliginiń Sot aktilerin oryndaý komıtetiniń Atqarý óndirisin qamtamasyz etý basqarmasynyń basshysy Erlan Shalabaevtyń aıtýynsha, azamattar sot oryndaýshysynan shaqyrý qaǵazyn alysymen, sotqa kelip ketýiniń mańyzdylyǵyn nazarǵa ala bermeıdi.
«Ókinishke qaraı, búgingi tańda azamattar sot oryndaýshynyń shaqyrý qaǵazy boıynsha mindetti túrde kelip ketýiniń mańyzdylyǵyn eskermeıdi. Óıtkeni atqarýshylyq jumystyń barynsha ońdy sheshilýine tulǵanyń iske sanaly jaýapkershilikpen qaraýy negiz bolady», - deıdi ol.
Basqarma basshysynyń aıtýynsha, «Atqarýshylyq is júrgizý jáne sot oryndaýshylarynyń mártebesi týraly» Qazaqstan Respýblıkasy Zańynda atqarýshylyq is júrgizý kezindegi taraptardyń quqyqtary men mindetteri anyq belgilengen.
Bıylǵy qańtar aıynda «Qazaqstan Respýblıkasynyń keıbir zańnamalyq aktilerine atqarýshylyq is júrgizýdi jetildirý máseleleri boıynsha ózgertýler men tolyqtyrýlar engizý týraly» Zańymen birqatar zańnamalyq aktilerge, onyń ishinde qoldanystaǵy atqarýshylyq is júrgizý týraly Zańǵa jáne Ákimshilik quqyq buzýshylyq týraly kodekske ózgertýler engizildi.
«Osylaısha, boryshker sot oryndaýshyǵa atqarýshylyq is aıaqtalǵanǵa deıin aıyna bir ret, keıde basqa da másele boıynsha jolyǵyp turýy qajet», - deıdi E. Shalabaev.
Onyń málimetinshe, bul rette boryshkerdiń sot oryndaýshyǵa jolyqpaýy atqarýshylyq is júrgizý organdarynyń nazarynan tys qalmaıtynyn aıtyp ketken jón. «Máselen, laýazymdy tulǵaǵa jolyqpaý Qazaqstan Respýblıkasynyń ákimshilik quqyq buzýshylyq týraly kodeksiniń 521-baby boıynsha boryshkerdiń ákimshilik jaýapkershilikke tartylýyna ákep soǵýy múmkin», - dep túsindiredi maman.
Egerde buryn atalmysh baptyń dıspozıtsııasymen bul jaıt jolyǵýdan jaltarý delinse, ıaǵnı sot oryndaýshysy boryshkerdiń ádeıi jolyǵýdan jaltarýyn dáleldeýge tıisti bolsa, búgin kelmegeniniń ózi boryshkerdi Qazaqstan Respýblıkasynyń ákimshilik quqyq buzýshylyq týraly kodeksiniń 521-baby boıynsha ákimshilik jazaǵa tartýdyń birden bir joly bolyp qarastyrylatyn boldy.
«Bul rette atalmysh baptyń sanktsııasymen sot oryndaýshysyna, sot prıstavyna atqarýshylyq is júrgizý máseleleri boıynsha kelmeý, sol sııaqty aıǵaq berýden bas tartý nemese kórineý jalǵan aıǵaqtar berý - jeke tulǵalarǵa aılyq eseptik kórsetkishtiń birden úshke deıingi mólsherinde, laýazymdy adamdarǵa besten onǵa deıingi mólsherinde aıyppul salýǵa ákep soǵady», - deıdi basqarma basshysy.
Aıta keteıik, osylaısha, Kodekske jáne atqarýshylyq is júrgizý zańnamasyna engizilgen ózgerister ýákiletti qyzmetkerdiń quziretin birshama keńeıtti. Egerde buryn sot oryndaýshy boryshkerdi izdeýge ýaqyty men qarajatyn jumsaıtyn bolsa, búgin zańnamanyń ózgerýine baılanysty, kerisinshe boryshker sot oryndaýshyǵa kelýge ózi múddeli bolady. Al jolyqpaǵan jaǵdaıda ol ákimshilik jaýapkershilikke tartylý múmkin.
«Degenmen, sot oryndaýshymen jolyǵýdan jaltarý faktisin moıyndaýdan buryn, boryshkerdiń dáleldi sebeptermen kele almaǵan amaldary eskeriledi. Oǵan aýyrǵan, jaqyn adamynyń (týysynyń) qaıtys bolǵan jaǵdaıynda, jumys babymen qyzmettik is-sapary, soǵys qımyldary, tehnogendi tabıǵat qubylystary jáne t.b. jaǵdaılar jatady. Sondyqtan kórsetilgen baptyń erejesimen azamattar qolǵa berilgen zańnyń barlyq múmkindikterin qoldana bilý qajet», - deıdi maman.
