Zańǵa bastamashylyq, referendým usyný, jyl saıynǵy sessııa – Halyq Keńesi qalaı jumys isteıdi
ASTANA. KAZINFORM – Halyq Keńesi – halyqtyń múddelerin bildiretin joǵary konsýltatıvtik organ bolady. Prezıdenttiń quqyqtyq máseleler jónindegi kómekshisi Erjan Jıenbaev Halyq keńesiniń jumysy týraly Konstıtýtsııaǵa qandaı ózgerister usynylǵanyn baıandady.
Onyń aıtýynsha, Halyq Keńesiniń mártebesin Konstıtýtsııada bekitý maqsatynda onda jeke bólim kózdeý usynylady.
– Birinshiden, Halyq Keńesi Qazaqstan Respýblıkasy halqynyń múddelerin bildiretin memleketimizdiń joǵary konsýltatıvtik organy ekendigi týraly normany kózdeý qajet. Quramy Qazaqstan Respýblıkasy azamattary qatarynan Memleket basshysy tarapynan qalyptastyrlatyndyǵyn qamtý kerek, - dedi E. Jıenbaev elordada Konstıtýtsııalyq sot ǵımaratynda.
Oǵan qosa, Halyq Keńesiniń memlekettiń ishki saıasatynyń negizgi baǵyttary – qoǵamdyq kelisimdi, jalpyulttyq birlikti jáne yntymaqtastyqty nyǵaıtý, memleket qyzmetiniń qaǵıdattaryn jáne jalpyulttyq qundylyqtardy ilgeriletýge qatysty usynystar men usynymdar ázirleý jónindegi negizgi ókilettikterin reglamentteý qajet.
Prezıdent Halyq Keńesi zań shyǵarýǵa bastamashylyq etý quqyǵyna ıe bolýy qajettigin atap ótti. Bul da Konstıtýtsııada bekitilýge tıis.
Sonymen birge, Halyq Keńesin Qazaqstan Respýblıkasynyń Prezıdentine respýblıkalyq referendým ótkizý týraly usynys engizý quqyǵymen qamtamasyz etý usynylady.
− Halyq Keńesiniń qurylý, quramyn qalyptastyrý tártibi, ókilettikteri men qyzmetin uıymdastyrý máseleleri bólek konstıtýtsııalyq zańmen aıqyndalatyn bolady. Halyq Keńesiniń joǵarǵy organy jylyna keminde bir ret shaqyrylatyn Sessııa bolady. Osylaısha, Halyq Keńesi Qazaqstan Halqy Assambleıasy jáne Ulttyq quryltaı tárizdi turaqty jumys isteıtin organ bolmaıdy, - dedi Prezıdenttiń quqyqtyq máseleler jónindegi kómekshisi.
Buǵan deıin E. Jıenbaev Vıtse-prezıdentke qoıylatyn talaptardyń úlgisin jarııalaǵan edi.
Jibek Joly arnasy Konstıtýtsııalyq reforma jónindegi komıssııanyń birinshi otyrysyn tikeleı efırde kórsetedi.