Zańdy tulǵany portal arqyly sanaýly mınýtta tirkeýge bolady - Baılanys jáne aqparat mınıstrligi
ASTANA. 1 shilde. QazAqparat - Búgingi kúni «Elektrondyq úkimettiń» portaly arqyly shaǵyn kásipkerlik sýbektisi bolyp tabylatyn jáne qalypty jarǵy negizinde óz isin júrgizip otyrǵan zańdy tulǵany tirkeýge bolady,
dep habarlaıdy QR BAM baspasóz qyzmeti.
Atalǵan qyzmet avtomattandyrylǵan. «Elektrondyq úkimet» zańdy tulǵalardy tirkeýde optımaldy jaǵdaı jasaýda. Bul óz isin jańadan bastaǵaly turǵan kásipkerlerge shuǵyl túrde óz kásibin tirkeýge múmkindik beredi.
Aıtyp ótý kerek, atalǵan memlekettik qyzmetke memlekettik tólemaqy tólenedi. Ol úshin bankke júgirip, kezek kútýdiń qajeti joq. Tólem kartochkasy arqyly portaldyń ózinde tranzaktsııa júrgizýge bolady.
Zańdy tulǵanyń memlekettik tirkeýge turǵany týraly kýálikti 1 kúnniń ishinde alýǵa bolady. «Elektrondyq úkimet» portaly arqyly ótinim berýge birer mınýtyńyzdy jumsaısyz. Ótinimdi toltyrý kezinde jyljymaıtyn múlikti tańdaısyz, toltyrylǵan meken-jaı keıin tirkelgen kompanııanyń zańdy meken-jaıy bolyp esepteledi. Jyljymaıtyn múlik avtomatty túrde MDQ-daǵy (memlekettik derekter qory) Jyljymaıtyn múlik tirkeliminen tekseriledi. Eger jyljymaıtyn múlik kompanııa basshysynyń nemese quryltaıshysynyń jeke menshigi bolyp eseptelse, birinshi kezekte, jyljymaıtyn múlik týraly suranym joldaý kerek. Budan keıin, ótinimde zańdy tulǵanyń barlyq rekvızıtteri (ataýy, kásip túri, shtaty, jarǵylyq kapıtaly) kórsetiledi.
Tirkeý kýáligin tirkeýshi organnan alasyz. Qazirgi ýaqytta bul qyzmet túri elektrondyq nusqada barlyq tulǵalar úshin kórsetiledi. Sheteldik azamattar (rezıdent emester), Qazaqstanda turýǵa ruqsat etilmegen azamattar men jasóspirimderge ǵana kórsetilmeıdi.
