Zańdy tulǵalarǵa aıyppul, belgili bir qyzmetpen aınalysý quqyǵynan aıyrý ne zańdy tulǵany taratý sanktsııalaryn qoldaný múmkindigi qarastyrylýda
ASTANA. 2 maýsym. QazAqparat - Erteń, 3 maýsym kúni, Astanadaǵy L.N.Gýmılev atyndaǵy Eýrazııa ýnıversıtetiniń bas ǵımaratynda QR Parlamenti Májilisiniń janyndaǵy Qoǵamdyq Palatanyń otyrysy ótedi.
Qoǵamdyq Palatanyń otyrysynda «Qazaqstan Respýblıkasynyń keıbir zańnamalyq aktilerine zańdy tulǵalardyń qylmystyq jaýapkershiligin engizý máselesi boıynsha ózgerister men tolyqtyrýlar engizý týraly» zań jobasy talqyǵa salynady.
Memleket basshysynyń 2009 jylǵy 2 jeltoqsandaǵy tapsyrmasyna sáıkes ázirlengen zań jobasymen Qazaqstan Respýblıkasynyń Azamattyq, Qylmystyq, Qylmystyq is júrgizý, Qylmystyq-atqarý kodeksterine jáne ózge de zańnamalyq aktilerge tolyqtyrýlar engiziledi. Atap aıtqanda, birqatar ekonomıkalyq, ekologııalyq, sybaılas jemqorlyq jáne terrorıstik qylmystary úshin zańdy tulǵalardyń qylmystyq jaýapkershiligin engizý qarastyrylǵan. Sondaı-aq zańdy tulǵalardyń qylmystary týraly ister boıynsha is júrgizý tártibin retteýge, sondaı-aq zańdy tulǵalarǵa qatysty qoldanylatyn qylmystyq jazalardy oryndaýǵa, zańdy tulǵalar úshin olardy qylmystyq jaýapkershilikke tartýǵa baılanysqan birqatar shekteýler engizýge baǵyttalǵan túzetýler engizý usynylady.
Qazirgi ýaqytta zańdy tulǵalardyń qylmystyq jaýapkershiligi Frantsııada, Germanııada, Belgııada, Danııada, Japonııada, Kanadada, AQSh-ta, Ońtústik Koreıada, Gollandııada, Norvegııada, Avstrııada, Iordanııada, Lıvanda, Sırııada, Qytaıda, Úndistanda, Rýmynııada, Moldovada jáne Lıtvada belgilengen. Álemdik tájirıbe kórsetkendeı, zańdy tulǵalardyń qylmystyq jaýapkershiligin engizý ekonomıkalyq qylmysqa qarsy is-qımyldyń tıimdi tetikterin qurý qajettiliginen týyndaǵan.
Jaýapkershiliktiń mundaı túri qylmystyq kórinisterden zalaldyń ornyn toltyrý deńgeıin kóteredi, sebebi zańdy tulǵalardyń qylmystyq jaýapkershiligi bar bolǵanda olarǵa tikeleı múliktik sanktsııalardy qoldanýǵa múmkindik týady.
Zańdy tulǵalarǵa mynadaı sanktsııalar qoldanylýy múmkin: aıyppul, belgilibir qyzmetpen aınalysý quqyǵynan aıyrý ne zańdy tulǵany taratý.
Zań jobasy Ekonomıkalyq saıasat jónindegi keńeste jáne Qylmystyq, qylmystyq is júrgizý zańnamasyn jáne jedel-izdestirý qyzmeti týraly zańnamany jetildirý jónindegi vedomstvoaralyq jumys tobynda qaraldy, sondaı-aq ol boıynsha sybaılas jemqorlyqqa qarsy jáne ǵylymı saraptamalar júrgizildi.
