Zańdy tulǵalardyń qylmystyq jaýaptylyǵyn engizý elimizdiń bıznes-klımatyna keri áserin tıgizedi

Búgin QR Parlamenti Senatynda «Zańdy tulǵalardyń qylmystyq jaýaptylyǵy: naqty jaǵdaılar jáne problemalar» taqyrybyndaǵy dóńgelek ústel barysynda «Atameken odaǵy» ulttyq ekonomıkalyq palatasynyń tóraǵasy Abylaı Myrzahmetov osylaı málim etti.

Talqylanǵan máselege qatysty «Atameken» odaǵynyń ustanymyn naqtylaǵan A. Myrzahmetov bundaı baǵyttaǵy zań jobasynyń bıznes-klımatqa zııan keltiretinin atap ótti. «Bizdiń oıymyzsha, zańdy tulǵalarǵa qylmystyq jaýaptylyqty engizý bızneske qosymsha aýyrtpashylyqty júkteıdi. Qazirgi kúni qoldanystaǵy Qylmystyq kodekstiń ózi kompanııalarda qyzmet atqaratyn laýazymdy jeke tulǵalarǵa jaýaptylyqty da tolyq qarastyrady. Sol úshin buǵan súıenip, zańdy tulǵanyń jaýaptylyǵyn arttyrýdyń qajeti shamaly degen oıdamyz», - deıdi Abylaı Myrzahmetov.

Onyń aıtýynsha, Elbasynyń tapsyrmasy boıynsha elimizde qylmystyq zańnamalardy izgilendirý úderisi júrip keledi. «Degenmen, solaı bola tura bıznestiń jaýaptylyǵyn zań arqyly aýyrlatýdyń mánin túsinbeımiz. Onyń ústine osy baǵytta salynady dep belgilengen  aıyppuldardyń ózi úlken júk. Bul tipti shaǵyn kásipkerlikti bankrottyqqa aparyp soǵýy múmkin», - deıdi «Atameken» basshysy.