Zańdy tulǵalardyń qylmystyq jaýapkershiligi ınstıtýtyn engizý elimizdiń halyqaralyq mindettemesinen týyndaıdy
ASTANA. 1 naýryz. QazAqparat /Qanat Mámetqazyuly/ - Búgin QR Parlamenti Májilisinde «QR keıbir zańnamalyq aktilerine zańdy tulǵalardyń qylmystyq jaýapkershiligin engizý máselesi boıynsha ózgerister men tolyqtyrýlar engizý týraly» zań jobasy boıynsha halyqaralyq sarapshylardyń qatysýymen «dóńgelek ústel» jıyny ótti.
Jıynnyń maqsaty shet elderdegi zańdy tulǵalardy qylmystyq jaýapkershilikke tartý jónindegi zańnamanyń tájirıbelik qoldanylýyn taldaý bolyp tabylady. Sharaǵa depýtattardan bólek múddeli memlekettik organdardyń, halyqaralyq úkimettik emes uıymdardyń ókilderi, sheteldik sarapshylar qatysty.
Basqosýdy ashyp sóz sóılegen Májilistiń Zańnama jáne sot-quqyqtyq reforma komıtetiniń tóraǵasy Rahmet Muqashev atalǵan ınstıtýtty engizýdiń ózektiligine toqtaldy. «Zańdy tulǵalardyń qylmystyq jaýapkershiligi ınstıtýtyn engizý Qazaqstannyń halyqaralyq mindettemelerin júzege asyrýdan týyndaıtyn dúnıe. Atap aıtqanda, bizdiń elimiz BUU-nyń eki konventsııasyn ratıfıkatsııalaǵan bolatyn. Onyń biri sybaılas jemqorlyq qylmysqa qarsy kúres konventsııasy bolsa, ekinshisi transulttyq uıymdasqan qylmysqa qarsy kúres jónindegi qujat», - dedi R.Muqashev. Onyń aıtýynsha, budan bólek, atalmysh jańa ınstıtýtty engizý 2010-2020 jyldarǵa arnalǵan Qazaqstannyń Quqyqtyq saıasat tujyrymdamasynda da qamtylyp otyr. «Jalpy, Qarjy polıtsııasy tarapynan ázirlengen «QR keıbir zańnamalyq aktilerine zańdy tulǵalardyń qylmystyq jaýapkershiligin engizý máselesi boıynsha ózgerister men tolyqtyrýlar engizý týraly» zań jobasyna qatysty depýtattar tarapynan da, bıznes qoǵamdastyq tarapynan da úlken suraqtar týyndap otyr. Sondyqtan da, bul baǵytta tájirıbe jınaqtaǵan elderdiń sarapshylaryn jumysqa tartýdyń mańyzy zor dep bilemin», - dedi R. Muqashev.
Esterińizge sala keteıik, jıynǵa Avstrııa, Latvııa, Moldova elderiniń sarapshylary qatysýda.
