Zańdy tulǵalardyń qylmystyq jaýapkershiligi ekonomıkalyq, ekologııalyq, terrorıstik jáne sybaılas jemqorlyq qylmystarǵa qatysty kózdeledi - A. Lýkın
ASTANA. 3 maýsym. QazAqparat /Qanat Mámetqazyuly/ - Zańdy tulǵalardyń qylmystyq jaýapkershiligi ekonomıkalyq, ekologııalyq, terrorıstik jáne sybaılas jemqorlyq qylmystarǵa qatysty kózdeledi.
Búgin QR Parlamenti Májilisiniń janyndaǵy Qoǵamdyq Palatanyń otyrysynda «Qazaqstan Respýblıkasynyń keıbir zańnamalyq aktilerine zańdy tulǵalardyń qylmystyq jaýapkershiligin engizý máselesi boıynsha ózgerister men tolyqtyrýlar engizý týraly» zań jobasyn talqylaý barysynda Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń orynbasary Andreı Lýkın osylaı málim etti.
«Qazaqstan úshin zańdy tulǵalardyń qylmystyq jaýapkershiligin engizý jańa ınstıtýt bolyp tabylady. Soǵan sáıkes, buny jaqtaýshylar da, qarsy shyǵýshylar da jetkilikti. Bizdiń oıymyzsha, bul máseleni ishki áleýmettik-ekonomıkalyq jaǵdaıdy esepke ala otyryp qarastyrǵan lázim»,- deıdi A. Lýkın. Onyń aıtýynsha, zańdy tulǵalardy jaýapkershilikke tartý eń alǵash ret 2011 jyly ákimshilik jaýapkershilikke tartý jolymen júzege asqan. Bul rette Qarjy polıtsııasynyń ókili korporatsııa qyzmetkeriniń jekeleı jaýapkershiligi tipti az mólsherde bolsa da keltirilgen shyǵyndy ótemeıtinin, sondaı-aq osyǵan uqsas qylmystar jasaýdyń aldyn almaıtynyn atap ótti. «Jalpy zańsyz tabys tapqysy keletin qazaqstandyq jáne sheteldik kompanııalar eńbek, salyqtyq jáne basqa da zańnamalardyń buzylýyna jol beredi. Sheteldik iri kompanııalardy alyp qarastyrsaq, olar óz memleketterinde bundaı zań buzýshylyqqa jol bermeıdi. Óıtkeni, ondaı kompanııalar úshin qylmystyq jaýapkershilik qarastyrylǵan», - dedi A. Lýkın. Onyń aıtýynsha, atalǵan máseleni talqylaý barysynda kóptegen halyqaralyq sarapshylar zańdy tulǵalardy qylmystyq jaýapkershilikke tartý ınstıtýtynyń tıimdiligin atap ótken. Al Qarjy polıtsııasy tarapynan ázirlengen zań jobasy Eýropalyq jáne Azııalyq elderdiń aldyńǵy qatarly tájirıbeleriniń negizine nazar aýdarylǵan. «Osy rette zańdy tulǵalardyń qylmystyq jaýapkershiligi ekonomıkalyq, ekologııalyq, terrorıstik jáne sybaıles jemqorlyq qylmystarǵa qatysty kózdeledi. Bularǵa aıyppul salynýy, belgili bir qyzmetpen aınalysýyn shekteý nemese zańdy tulǵany joıý túrindegi jazalar qoldanylýy múmkin», - dedi A. Lýkın.
