Zańdy tulǵalar kóliginiń salyǵyn tóleý merzimi aýystyryldy

NUR-SULTAN. QazAqparat - Zańdy tulǵalardyń kólik salyǵy boıynsha salyq mindettemesin oryndaý merzimi aýystyryldy, dep habarlaıdy QazAqparat Memlekettik kirister komıtetine silteme jasap.

Salyq tóleýshilerden kóptep kelip jatqan suraqtarǵa baılanysty Qarjy mınıstrliginiń Memlekettik kirister komıteti zańdy tulǵalar kólik quraldary salyǵy boıynsha salyq mindettemesin oryndaý merziminiń kóshirilýine qatysty túsindirme berdi.

«Salyq kodeksiniń 494-babynyń 1-tarmaǵyna sáıkes jáne 496-babynyń 1-tarmaǵyna sáıkes zańdy tulǵalar aǵymdaǵy tólemder somasyn tóleýdi jáne aǵymdaǵy tólemderdiń esep-qısabyn usynýdy salyq salý obektileriniń tirkelgen jeri boıynsha salyq kezeńiniń 5 shildesinen keshiktirmeı júrgizýi qajet», delingen habarlamada.

Sonymen qatar, Salyq kodeksiniń 38-babynyń 2-tarmaǵyna sáıkes, eger salyqtyq mindettemeni oryndaý merziminiń sońǵy kúni jumys kúni bolmasa, onda merzim kelesi jumys kúniniń sońynda aıaqtalady.

«Osylaısha, 2021 jyly 6 shilde mereke kúni ekenin jáne demalys kúnniń 5 shildege aýystyrylǵanyn eskersek, kólik quraldary salyǵy boıynsha aǵymdaǵy tólemder somasyn tóleý men aǵymdaǵy tólemderdiń esep-qısabyn usyný boıynsha salyq mindettemesin oryndaý merzimi kelesi jumys kúniniń sońynda, ıaǵnı 7 shildede aıaqtalady», - dep túsindirdi komıtettten.

Qazir salyqtyń tóleý merzimin 7 shildege aýystyrýǵa qatysty vedomstvonyń aqparattyq júıelerin jańartý júrgizilip jatyr.