Zańdy qaıta-qaıta jańartý onyń jıi buzylýyna ákep soqtyrady - Q. Jaqypov
ASTANA. QazAqparat - Zańdy qaıta-qaıta jańartý onyń jıi buzylýyna da ákep soǵady. Sonyń saldarynan qoǵamdyq quqyqtyq nıgılızmniń qalyptasýyna da jol beriledi.
Búgin Parlament palatalarynyń birlesken otyrysynda tórtinshi sessııa jumysyn qorytyndylaǵan Májilis Tóraǵasy Qabıbolla Jaqypov osylaı málimdedi.
Májilis spıkeri keltirgen derekterge qaraǵanda, tórtinshi sessııa barysynda qoldanystaǵy 206 zańǵa ózgerister men tolyqtyrýlar engizilgen eken. Úkimettiń bastamasymen osy sessııanyń ózinde Ákimshilik quqyq buzýshylyq týraly kodekske - 12 ret, Salyq kodeksine - 10, Eńbek kodeksine - 9 ret ózgerister men tolyqtyrýlar jasalǵan.
«Týra sol sekildi «Jol júrisi qaýipsizdigi týraly» zańdy mysalǵa alaıyq. Alǵashynda depýtattar kólik quraldaryn basqarýǵa senimhatty jáne senimhat boıynsha ony paıdalanatyn tulǵalardy esepke tirkeý týraly normany alyp tastaýdy usynǵan bolatyn. Buny Úkimet qoldamady. Alaıda keıinnen zań qoldanysqa engenge deıin, ıaǵnı alty aı ishinde Іshki ister mınıstrliginiń bastamasymen Úkimet týra sol túzetýlerdi engizýge ózderi bastama jasady. Sózsiz, zańnamany bulaısha qaıta-qaıta jańartý onyń jıi buzylýyna, quqyq qoldaný salasynda abaısyz qatelikter jasaýǵa, eń aqyry qoǵamdyq quqyqtyq nıgılızmniń qalyptasýyna ákep soqtyrady», - dedi spıker.
Onyń paıymynsha, zańnamadaǵy bundaı jıi-jıi ózgerister oryn alýynyń basty sebepteriniń biri zań jobalaryn ázirleý barysynda Parlament depýtattarynyń ókildik-zańnamalyq áleýetin tolyq paıdalanbaýda jatyr. «Bul rette perspektıvalyq josparlaýdyń da álsiz ekenin aıta ketkimiz keledi. Keıbir zańnamalar qabyldanyp, kúshine enbeı jatyp ózgeristerge ushyraýǵa májbúr bolady. Máselen, qoldanysqa engizilgenge deıin Qylmystyq protsessýaldy kodeks eki márte, Qylmystyq atqarý kodeksi úsh márte túzetildi. Sonymen qatar, Úkimetten kelip túsken zań jobalarynyń árbir úshinshisiniń mazmuny 50 paıyzǵa deıin ózgerip otyrdy. Al «Qazaqstan Respýblıkasynyń keıbir zańnamalyq aktilerine kásipkerlik qyzmetke memlekettiń aralasýyn shekteý máseleleri boıynsha ózgerister men tolyqtyrýlar engizý týraly» zań jobasynyń mazmuny Parlament qabyrǵasynda jatyp 85 paıyzǵa deıin ózgertildi», - dedi Májilis Tóraǵasy.
