«Zańdy azdap qana buzdy» degen bap bar ma?» - respýblıkalyq basylymdarǵa sholý

***

«Premer-Mınıstr Kárim Másimov Qostanaı oblysyndaǵy saparyn Reseımen shekaradaǵy "Qaıraq" keden beketinen bastady. Onda Úkimet basshysy Keden odaǵy sheńberindegi keden, shekara jáne salyq qyzmetteriniń jumysymen jaqynyraq tanysty», dep jazady «Egemen Qazaqstan» gazeti. Munan keıin Kárim Másimov oblys ortalyǵyndaǵy "Qostanaı sý" memlekettik kommýnaldyq kásipornyna baryp, qalany aýyzsýmen qamtamasyz etýdiń jaı-japsaryn kórdi. Osydan Premer-Mınıstr Arqalyq qalasynda bolyp, onda «Qaırat» sport keshenine, Y.Altynsarın atyndaǵy memlekettik pedagogıka ınstıtýtyna bardy. Sodan keıin Torǵaı boksıt ken basqarmasynyń óndiris aımaǵyn aralaǵan. Úkimet basshysynyń soltústik óńirdegi sapary jaıynda basylymnyń búgingi nómirindegi «Sheshimin kútken máseleler az emes» atty maqaladan egjeı-tegjeıli oqı alasyzdar.

Osy basylymda Qazaqstan Jazýshylar odaǵynyń tóraǵasy, Memlekettik syılyqtyń laýreaty Nurlan Orazalınniń «Táýekelmen sabyrǵa sýarylǵan» degen taqyryppen kólemdi maqalasy jaryq kórdi. «Nursultan Nazarbaev - qos ǵasyr toǵysynda qazaq deıtin halyqtyń, Qazaqstan deıtin memlekettiń ataǵy men abyroıyn álemge keń jaıǵan, dáýir júgin arqalaǵan sol eýrazııalyq tuǵyrly tulǵalardyń jańa zamandaǵy jańa turpatty jalǵasy, ár zaman, ár dáýirlerde ótken alash urandy, arqar múıizdi qazaqtyń basyn qosyp, táýelsiz memleket bolýdy kóksegen arystarymyz ben alyptarymyzdyń amanat-armanyn júzege asyrǵan ult kósemi», dep jazady jarııalanym avtory. Maqalanyń tolyq nusqasyn oqyǵyńyz kelse basylymnyń senbilik sanyna nazar salyńyz.

Keshe Joǵarǵy Sot Tóraǵasy Musabek Álimbekovtiń tóraǵalyq etýimen respýblıka sottarynyń 2010 jyldyń birinshi jartyjyldyǵyndaǵy jumysynyń qorytyndylary boıynsha Joǵarǵy Sot sýdıalarynyń keńeıtilgen keńesi bolyp ótti. «Respýblıka sottarynyń 2010 jyldyń birinshi jartyjyldyǵyndaǵy jumysynyń qorytyndylary boıynsha Joǵarǵy Sot sýdıalarynyń keńeıtilgen keńesine shaqyrylǵan oblystyq jáne oǵan teńestirilgen sot tóraǵalaryna aldymen semınar sabaqtary júrgizildi. Onda ústimizdegi jyldyń birinshi jartyjyldyǵynda apellıatsııalyq tártippen qylmystyq isterdi qaraý boıynsha Joǵarǵy Sottyń sot praktıkasy, qadaǵalaý tártibindegi ótinishter men isterdi qaraýdyń keıbir máseleleri aıtyldy», dep jazady basylym.

***

«Alash aınasy» gazetiniń senbilik sanynda «Zańdy azdap qana buzdy» degen bap bar ma?» atty maqala jarııalanǵan. Maqalada elimizdegi quqyqtyq reformany ózgertý kezek kúttirmes sharýa ekeni aıtyla kelip, Joǵarǵy sottyń Qylmystyq isterdi baqylaý alqasynyń tóraǵasy Aqyltaı Qasymovtyń «Elimizdiń keıbir oblystaryndaǵy sýdıalar qylmystyq nemese ákimshilik zań buzý áreketterimen baılanysty jaǵdaıdy durys baǵalaı bilse, endigi bir aımaqtarda olar shekten tys jumsaqtyq tanytyp jatady», - degen sózin mysalǵa keliteredi. Onyń aıtýynsha, Qazaqstandaǵy keıbir oblystyq sottardyń sýdıalary atalmysh jaǵdaıdy ózderiniń jumystarynyń shekten tys aýqymdylyǵymen, keı jaǵdaıda «zańdy azdap qana buzdy» degen sebeppen aqtap alǵylary keledi. «Biz bundaı pikirmen kelispeımiz. Sebebi, meıli az deńgeıde bolsa da, árbir buzylǵan quqyq - bul azamattardyń quqyqtary. Sondyqtan bundaı quqyqty buzǵan azamat mindetti túrde jaýapqa tartylýy tıis. Árıne, sot ókilderiniń ákimshilik nemese qylmystyq isterge qatysty tym jumsaq sheshim qabyldaýy - jappaı oryn alyp otyrǵan áreket emes. Degenmen mundaı jaǵdaılar ara-tura kezdesip qalady. Ázirge mundaı jaǵdaı biz tekserý júrgizgen aımaqtardyń ishinde Shyǵys Qazaqstan men Pavlodar oblystarynda baıqaldy», - deıdi Joǵarǵy sot ókili.

Sondaı-aq osy basylymnyń 5-shi betinde «Qazaq jeriniń hıkmetteri» aıdarymen «Ǵalamaty kóp qasıetti Ǵaıyperen qyryq shilten» degen maqala berilgen. Avtor «Qudaıdyń qudirettiligi bolar, shynynda da, alaqandaı jerden neshe túrli beınelerdiń tas músinin kórýge bolady. Adam ata men Haýa ananyń, ushqan qus pen júgirgen ańdardyń beınesi bir Allanyń qudirettiligimen joqtan bar bolǵan, ǵaıyptan paıda bolǵan deıdi. Ǵaıyperen - osy turǵan kúsh-qudiret, al qyryq shilten - kózge kórinbeıtin qyryq bir ata» dep sýretteı kelip, Ǵaıyperen qyryq shilten áýlıeniń keremettiligin jan-jaqty asha bilgen.

***

«Aıqyn» gazetiniń dástúrli «Aq sóıle!» aıdarynyń búgingi qonaǵy - «Astana» eksh-fılmder kınofestıvaliniń prezıdenti, kınorejısser, prodıýser Tımýr Bekmambetov. Basylym tilshisiniń barlyq saýaldaryna tuşymdy jaýap bergen T.Bekmambetovtiń suhbaty «Oskar» syılyǵyn alý maqsatym emes» degen taqyryppen jarııalanǵan.

«Densaýlyq saqtaý mınıstri Jaqsylyq Dosqalıev jaqsy bastama kóterdi. Onyń aıtýynsha, 2011 jyldan bastap Qazaqstannyń aımaqtarynda balalar kardıoortalyqtary quryla bastaıdy. «Búginde kardıologııa jumysy jaqsy jolǵa qoıyldy, endigi kún tártibine - balalar kardıologııasyn damytýdy qoıý kerek» degen mınıstr jańa ortalyqtardyń oblystyq aýrýhanalar janynan ashylatynyn jetkizdi», dep jazady «Aıqyn» gazeti. Maqalada aıtylǵan jaıttyń egjeı-tegjeıin basylymnyń senbilik nómirindegi «Balalar kardıoortalyqtary qurylady» degen taqyryptan oqı alasyzdar.

***

«Astana aqshamy» gazetiniń jazýynsha, shildeniń 5-inde Elbasynyń qatysýymen saltanatty túrde ashylǵan «Han shatyr» oıyn-saýyq keshenine elordalyqtar men qala qonaqtary kóptep kelýde. Basylymnyń atap ótýinshe, shildeniń 6-sy kúninde ǵana atalǵan ortalyqty 140 myń adam tamashalaǵan.

***

Memleket basshysynyń atyna hat-habarlar kelip túsýde. Ózderiniń hattary men jedelhattarynda Qazaqstan Respýblıkasynyń resmı adamdary, azamattar men uıymdar mereıjaspen jáne Elorda kúnimen shynaıy quttyqtaýlaryn jetkizgen. «Prezıdent poshtasyna quttyqtaýlar Astanadan Qazaqstan Respýblıkasy Parlamentiniń birinshi shaqyrylymynyń depýtattary - Rysty Jumabekovadan, Lılııa Mýsınadan, Roza Qýanyshbaevadan keldi», dep jazady «Kazahstanskaıa pravda» gazeti. Sondaı-aq Astana qalasynan "Vaınah" etnomádenı ortalyǵy AQ-tyń músheleri: "Biz, elordadaǵy cheshender men ıngýshter Sizdiń ulttyq saıasatyńyzdy qyzý qoldaımyz. Óıtkeni, biz úshin Qazaqstan jappaı qýǵyn-súrgin jyldarynda, shyn máninde tek pana bolyp qana qoıǵan joq, biz úshin jáne bizdiń urpaǵymyz úshin Otanymyzǵa aınaldy", - dep jazady.

Belgili qazaqstandyqtardyń Prezıdentti shyn júrekten quttyqtap, ıgi tilekterin bildirgen hattary «Egemen Qazaqstan» gazetinde de «Er mereıi - el mereı» degen taqyryp aıasyna toptastyrylyp berilgen.