Zańdy tulǵalardan kıberalaıaqtyqtyń aldyn alý talap etiledi
ASTANA. KAZINFORM — Kıberalaıaqtyq qaterlerin jáne jalpy alaıaqtyq operatsııalardy aıtarlyqtaı azaıtatyn júıe jóninde QR Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın málimdedi.
– Jańadan qabyldanǵan zańdar aıasynda bıznes úshin mindetti túrde nómirdi sáıkestendirý talabyn engizdik. Bul kıberalaıaqtyq qaterlerin jáne jalpy alaıaqtyq operatsııalardy aıtarlyqtaı azaıtady dep esepteımiz. Óıtkeni, sizge qandaı da bir zańdy tulǵadan qońyraý túsken kezde, ol nómir telefonyńyzdaǵy kontaktiler tiziminde saqtalmaǵan bolsa da, ekranda birden kompanııanyń ataýy kórsetiledi, – dedi ol Úkimet otyrysynan keıingi brıfıngte.
Vıtse-mınıstrdiń sózinshe, qazir osy júıeni iske qosýǵa qajetti tehnıkalyq jumystar júrgizilip jatyr.
Degenmen, ol jobanyń naqty qashan iske qosylatynyn naqty bilmeıtinin aıtty. Bul máselege tikeleı jaýapty Telekommýnıkatsııalar komıtetindegi áriptesterinen naqtylaý qajettigin atap ótti.
Aıta keteıik, buǵan deıin Qazaqstanda jumys berýshiler qyzmetkerlerine kıberqaýipsizdikti oqytýǵa mindetteletinin jazǵanbyz.
