Zańdy qadirleý – ár adamnyń jarqyn ómirine jol ashatyn mańyzdy shart - Toqaev
ASTANA. KAZINFORM – Adam jáne onyń ómiri - elimizdiń Ata zańyna arqaý bolǵan basty qundylyq. Bul týraly elordadaǵy «Ákimshilik ádilet jáne onyń quqyq ústemdigin qamtamasyz etýdegi róli» atty halyqaralyq forýmda Memleket basshysy Qasym-Jomart Toqaev málim etti.
- Sońǵy jyldary memleketimiz asa aýqymdy quqyqtyq jáne qoǵamdyq jańǵyrý jolyna tústi. Elimizde jańa saıası mádenıet qalyptasa bastady. Biz órkenıetti el retinde Zań men tártip qaǵıdatyn ulttyq bolmysymyzdyń ajyramas bóligine aınaldyrýymyz kerek. Barsha azamattarǵa, ásirese, jastarǵa zańdy qurmetteý, zańǵa baǵyný qajet ekenin qarapaıym tilmen jan-jaqty túsindirgen jón. Zańdy qadirleý, tártipti qoldaý, bul - ár adamnyń jarqyn ómirine jol ashatyn mańyzdy shart. Jalpyulttyq referendýmda qabyldanǵan jańa Konstıtýtsııamyzda osy negizgi qaǵıdat týraly anyq jazyldy, - dedi Qasym-Jomart Toqaev.
Prezıdenttiń aıtýynsha, Qazaqstannyń Bas qujaty - barsha azamatqa teń múmkindik beretin ádiletti qoǵamnyń myzǵymas tuǵyry.
- Adam jáne onyń ómiri - elimizdiń Ata zańyna arqaý bolǵan basty qundylyq. Konstıtýtsııada azamattardyń quqyqtary men bastandyqtaryn saqtaý, zań ústemdigin qamtamasyz etý, halyqtyń turmys sapasyn jaqsartý memlekettiń basty mindetteri retinde aıqyndaldy, - dedi Memleket basshysy.
Buǵan deıin habarlanǵandaı, forým barysynda Prezıdent memleket pen qoǵam tutastyǵyn nyǵaıtý aldyńǵy qatarly mindettiń biri ekenin atap ótti.
