Zańdy bıznesti negizsiz toqtatý ınvestıtsııalyq ahýalǵa zııan keltiredi – Prezıdent
ASTANA. KAZINFORM – Bul týraly Memleket basshysy Qasym-Jomart Toqaev Qarjylyq monıtorıng agenttiginde ótken jıynda aıtty.
Prezıdent barlyq quqyq qorǵaý organy bızneske zańsyz kedergi keltirý memleket múddesine qarsy aýyr qylmyspen parapar ekenin túsinýge tıis ekenin atap ótti.
Memleket basshysy Agenttiktiń kásipkerlermen jumys tásilin qaıta qaraýǵa shaqyrdy
– Bıznestiń damýyn tejeıtin kedergilerdi joıý kerek. Bul baǵytta biraz jyldan beri júıeli jumys júrgizilip keledi. Biraq «Atameken» ulttyq kásipkerler palatasynan, jekelegen bıznes ókilderinen áli de aryz-shaǵym túsip jatyr. Barlyq quqyq qorǵaý organy bızneske zańsyz kedergi keltirý memleket múddesine qarsy aýyr qylmyspen parapar ekenin túsinýge tıis. Bul, eń aldymen, Qarjylyq monıtorıng agenttigine qatysty. Maǵan aımaqtarda qara basynyń qamy úshin zańdy bıznesti toqtatý tájirıbesi áli de bar degen shaǵymdar kelip túsip jatyr.
Eskertemin: eger álgindeı málimetter rastalsa, zańǵa sáıkes jaýapqa tartyp, keltirilgen shyǵyndy óndirip alý úshin qatań sharalar qabyldanady.
Byltyr Agenttik tergeý júrgizgen qylmystyq isterdiń 40 paıyzy, ıaǵnı myńnan astamy negizsiz dep toqtatylǵan.
Mysaly, 2025 jyly Agenttik 2710 is qozǵaǵan, onyń 1061-inde kúdiktiler aqtalyp, is toqtatylǵan. Bul jaı ǵana kórsetkish emes. Osyndaı isterdiń saldarynan kásipkerler shyǵynǵa ushyraıdy, olardyń iskerlik bedeline nuqsan keledi, eńbek ujymdarynyń berekesi qashady. Munyń bári bıznestiń damýyn tejeıdi, eldegi ınvestıtsııalyq ahýalǵa zardabyn tıgizedi. Sondyqtan kásipkerlermen qarym-qatynas ornatý tásilderin qaıta qaraǵan jón.
Ógizdi de óltirmeı, arbany da syndyrmaı, aqylǵa qonymdy tepe-teńdikti saqtaı bilý qajet. Kásipker qarjy zańnamasyn buzǵan jaǵdaıda onyń sharýashylyq qyzmetin birden toqtatyp tastaýǵa bolmaıdy. Shekteý sharalaryn quqyq buzýshylyqtyń deńgeıine sáıkes erekshe jaǵdaılarda ǵana qoldaný kerek. Kásipkerler de zań talaptaryn qatań saqtaýǵa mindetti. Memlekettiń oń kózqarasy men qorǵaýyn paıdalanyp, salyqtan jaltarýǵa, alaıaqtyq shemalar jasaýǵa bolmaıdy. Alaıaqtyqqa múldem jol bermeımiz, – dedi Prezıdent.
Aıta ketelik Memleket basshysy JI múmkindigin paıdalanyp, taldaý-saraptaý jumysyn kúsheıtýdi tapsyrǵan edi.