Zańdar eń aldymen qalyń kópshilikke túsinikti, qoldanysta yńǵaıly bolýy kerek - Q. Toqaev
ASTANA. QazAqparat - Zańdar eń aldymen qalyń kópshilikke túsinikti, qoldanysta yńǵaıly bolýy kerek. Búgin Senattyń jalpy otyrysynda palata Tóraǵasy Qasym-Jomart Toqaev osylaı málimdedi.
«Parlament qysqa merzim ishinde qoǵamdyq qatynastar júıesin keshendi jańǵyrtý sharalaryn qamtıtyn, Ult josparyn iske asyrý boıynsha sheshimder qabyldady. Elbasy Úkimettiń keńeıtilgen otyrysynda bul mańyzdy máseleler boıynsha tıisti baǵasyn berdi. Memleket basshysy bul zańdardyń birqataryna, sonyń ishinde tuńǵysh ret jarııa túrde Azamattyq protsestik kodekske qol qoıdy. Prezıdent quqyq salasyna túbegeıli ózgerister ákeletin bul kodekstiń mańyzy zor ekenine aıryqsha nazar aýdardy. Sonymen qatar, kásipkerlikti qoldaý máselelerine arnalǵan, ýaqyt talabyna saı keletin jańa Kásipkerlik kodeksi men halyqaralyq standarttarǵa negizdelgen Eńbek kodeksi qabyldandy. Budan basqa qabyldanǵan zańdardyń barlyǵy elimizdiń áleýmettik-ekonomıkalyq turaqty damýyna jáne halyqtyń ál aýqatyn arttyrýǵa tyń serpin beredi dep sanaımyn», - dedi palata spıkeri.
Sonymen qatar, Senat Tóraǵasy Ult josparyn iske asyrýǵa baǵyttalǵan zańdardyń basym kópshiligi 2016 jyldyń 1 qańtarynan bastap qoldanysqa enetinin aıtyp, aldaǵy kezeńde osy zańdardyń máni men mańyzyn qoǵam nazaryna keńinen jetkizýge atsalysý qajettigin atap ótti.
«Zańdar eń aldymen qalyń kópshilikke túsinikti, qoldanysta yńǵaıly bolýy kerek. Úkimet pen jergilikti atqarýshy organdar jańa zań normalaryn múltiksiz iske asyrýdy jáne tıisti zańǵa táýeldi aktilerdi ázirleýdi jedel qolǵa alýy qajet. Elimizdiń áleýmettik ekonomıkalyq órleýin tyń belesterge bastaıtyn Prezıdenttik reformany tabysty iske asyrý úshin biz kúsh-jigerimizdi aıamaı jumsaıtyn bolamyz dep kámil senemin», - degen Senat spıkeri depýtattyq korpýs pen Úkimet múshelerine birlese atqarǵan jumystary úshin alǵysyn jetkizdi.
