Zańdaǵy jańa normalar kámeletke tolmaǵandardyń qaýipsizdigin qamtamasyz etýge úles qosady – sarapshy
ASTANA. KAZINFORM – Kúndelikti quqyq qorǵaý organdaryna turmystaǵy zorlyq-zombylyq faktileri boıynsha 300-ge jýyq aryz kelip túsedi. Bul týraly QR Prezıdenti janyndaǵy Qazaqstannyń strategııalyq zertteýler ınstıtýty Saıası zertteýler bóliminiń bas sarapshysy Dýlat Óteǵalı aıtty.
«Memleket basshysy Qasym-Jomart Toqaev áıelderdiń quqyqtaryn jáne balalardyń qaýipsizdigin qorǵaýǵa baǵyttalǵan zańǵa qol qoıdy. Bul qujat negizinde 15 zańnamalyq aktige, onyń ishinde jeti kodeks pen segiz zańǵa ózgerister men tolyqtyrýlar engizildi. Atap aıtqanda, áıelder men balalarǵa qatysty zorlyq-zombylyqtyń kez kelgen kórinisteri úshin jaýapkershilik qatańdatyldy. Qazirgi kezde qazaqstandyq qoǵamda otbasyndaǵy ári turmystaǵy zorlyq-zombylyq máselesi ózekti ekeni aıqyn. Bas prokýratýranyń málimetinshe, elimizde jyl saıyn abıýzerlerdiń qolynan keminde 80 áıel qaza tabady, kúndelikti quqyq qorǵaý organdaryna turmystaǵy zorlyq-zombylyq faktileri boıynsha 300-ge jýyq aryz kelip túsedi», - dedi D.Óteǵalı.
Onyń aıtýynsha, 2023 jyly quqyq qorǵaý organdaryna turmystaǵy zorlyq-zombylyqqa qatysty 100 myń shaǵym túsken. BAQ pen áleýmettik jelilerde de kúndelikti osy problemaǵa qatysty túrli jaǵdaılar men quqyq buzý derekteri týraly aqparat tarap jatady.
«Oǵan qosa, atalǵan zańdy Senatta talqylaý kezinde 154 myńnan astam qazaqstandyq otbasyndaǵy zorlyq-zombylyq úshin jazany kúsheıtý jónindegi onlaın petıtsııaǵa qol qoıdy. Bul óz kezeginde qoǵamda atalǵan máselege qatysty erekshe nazar aýdarylyp otyrǵanyn baıqatty. Sol sebepten, zańda kórsetilgen ózgerister qoǵamda zorlyq-zombylyqqa jol bermeý mádenıetin qalyptastyrýǵa, sondaı-aq adam quqyqtary birinshi orynda ekenin dáripteý aıasynda qoǵamdaǵy qatynastardyń jańa zamanaýı modelin qalyptastyrýǵa áserin tıgizýi tıis. Sonymen birge, mańyzy joǵary otbasy ınstıtýtyn nyǵaıtýǵa jáne kámelet jasqa tolmaǵandardyń qaýipsizdigin qamtamasyz etýge úlesin qosýy qajet», - dedi sarapshy.
Aıta keteıik, Prezıdent áıel quqyǵy men balalardyń qaýipsizdigin qamtamasyz etetin zańdarǵa qol qoıdy.
