Zańdaǵy ózgerister kolledjderdiń óndiristik áleýetin arttyrýǵa jol ashty
ASTANA. KAZINFORM — Qazaqstanda memlekettik kolledjderdiń oqý-óndiristik qyzmetin damytýǵa múmkindik keńeıdi. Zańǵa engizilgen ózgeristerdiń arqasynda endi olar óndiristik baǵyttaryn keńeıtý úshin qosymsha kelisim alýǵa mindetti emes. Bul stýdentterdiń tájirıbelik daıarlyǵyn kúsheıtip, kolledjderdiń materıaldyq-tehnıkalyq bazasyn jaqsartýǵa yqpal etedi. Bul týraly Oqý-aǵartý mınıstrligi málim etti.
Tıisti ózgerister «Qazaqstan Respýblıkasynyń keıbir zańnamalyq aktilerine áleýmettik zańnamany jetildirý máseleleri boıynsha ózgerister men tolyqtyrýlar engizý týraly» Zańy aıasynda Kásipkerlik kodekske engizildi. Buǵan deıin kolledjder oqý-óndiristik protsess sheńberinde óndirilgen ónimdi ótkize alǵanymen, memlekettik kolledjder qyzmet túrlerin keńeıtý nemese ózgertý kezinde básekelestikti qorǵaý salasyndaǵy ýákiletti organnyń kelisimin alýǵa mindetti bolatyn. Endi bul ákimshilik kedergiler joıyldy.
— Jańa múmkindikter kolledjderge oqý-óndiristik sheberhanalardyń áleýetin tıimdi paıdalanýǵa, naqty tapsyrystardy oryndaýǵa jáne óndiristik baǵyttaryn damytýǵa jol ashady. Stýdentter oqý barysynda nan ónimderin, toqyma buıymdaryn, jıhaz jáne basqa da ónimderdi daıyndaýǵa qatysyp, bolashaq mamandyǵyn naqty óndiristik ortada meńgere alady, delingen habarlamada.
Mundaı qyzmetten túsetin kirister kolledjderdiń jabdyqtaryn jańartýǵa, oqý-óndiristik sheberhanalardy jańǵyrtýǵa jáne materıaldyq-tehnıkalyq bazany nyǵaıtýǵa baǵyttalady.
Qazirgi tańda elimizdegi 37 kolledjdiń bazasynda 66 shaǵyn kásiporyn jumys isteıdi. Sonymen qatar Básekelestikti qorǵaý jáne damytý agenttiginiń aýmaqtyq departamentterimen birlesip, 51 kolledj úshin 38 baǵyt boıynsha qosymsha qyzmet túrlerin iske qosý máselesi qarastyrylýda.
Qabyldanǵan ózgerister stýdentterdiń praktıkalyq daıarlyǵynyń sapasyn arttyryp, naqty óndiristik tájirıbesi bar jáne eńbek naryǵynda suranysqa ıe mamandar daıarlaýǵa qolaıly jaǵdaı jasaıdy.
Aıta keteıik, buǵan deıin kolledjderde suranysqa ıe mamandyqtarǵa basymdyq beriletinin jazdyq.
