Zań jobasynyń maqsaty - úkimettik emes uıymdardy memleket tarapynan qoldaý júıesin odan ári jetildirý
Sonymen qatar zań jobasynyń maqsaty - memlekettik tapsyrysty iske asyrýǵa bólinetin bıýdjet qarajatyn tıimdi ıgerýge qoǵamdyq qatynastar sýbektileriniń jaýapkershiligin arttyrý, memlekettik áleýmettik tapsyrysty bólýde memlekettik saıasattyń basymdyqtary men respýblıkadaǵy jáne jekelegen óńirlerdegi áleýmettik-ekonomıkalyq damý qajettilikterin eskerý bolyp tabylady.
Otyrysta Zań jobasynyń maqsaty jóninde QR Mádenıet mınıstrliginiń jaýapty hatshysy Janna Qurmanǵalıeva baıandama jasady.
«Barshańyzǵa aıan, Memleket basshysy bıylǵy jylǵy óz Joldaýynda úkimettik emes uıymdardyń qyzmet etýine qolaıly jaǵdaılar jasaý, qoǵamdy demokratııalandyrýdyń mańyzdy sharty dep erekshe atap ótken bolatyn. Bul mindet, ásirese, Qazaqstannyń Eýropadaǵy qaýipsizdik jáne yntymaqtastyq uıymyna tóraǵalyq etip otyrǵan tusynda ózekti bolyp otyr. Osy zań jobasy aıasynda bilikti sarapshylardan turatyn aýqymdy top belsendi túrde jumys júrgizdi. Sarapshylar tobynyń quramyna 100-den astam úkimettik emes uıymdardyń jetekshileri, Májilis depýtattary, ár túrli memlekettik organdardyń ókilderi engen bolatyn. Barlyq Úkimettik emes uıymdar men halyqaralyq uıymdardyń ókilderine zań jobasynyń elektrondyq nusqasyn taratý sharalary uıymdastyryldy. Osy zań jobasy arqyly «Memlekettik áleýmettik tapsyrys» jáne «Memlekettik satyp alý týraly» qoldanystaǵy zańdarǵa 12 túzetý engizý usynylyp otyr. Bul usynynylyp otyrǵan ózgerister memlekettik áleýmettik tapsyrysty úlestirý úrdisin jetildirýge jáne onyń ashyqtyǵy men aıqyndyǵyn arttyrýǵa baǵyttalǵan»,- dedi Janna Qurmanǵalıeva.
Baıandamashyǵa birqatar depýtattar suraqtar qoıyp, óz pikirlerin aıtty. Búgingi otyrysqa QR Parlamenti Májilisiniń depýtattary jáne zań jobasyn ázirleýshiler - Qazaqstan Respýblıkasynyń Mádenıet jáne ózge de mınıstrlikterdiń, úkimettik emes uıymdardyń ókilderi qatysty.
Otyrysty qorytyndylaǵan Májilistiń Áleýmettik-mádenı damý komıtetiniń tóraıymy Dınar Nóketaeva: «búgingi zań jobasynyń tusaýkeserinde biraz máselelerdi anyqtap óz oılarymyzdy ortaǵa salyp, pikir alystyq. Zań jobasyna, ony ázirleýshilerge eskertýler men jaqsy tilekter de boldy. Olardyń bári jumys tobynyń otyrystarynda qaralatyn bolady. Zań jobasy boıynsha bizdiń Áleýmettik-mádenı damý komıtetiniń qaýlysymen jumys toby quryldy. Jumys tobynyń quramynda Májilistiń barlyq komıtetteriniń ókilderi-depýtattar, zań jobalaryn ázirleýshiler, mınıstrlikterdiń jáne «Qazaqstannyń Azamattyq Alıansy» zańdy tulǵalar birlestiginiń ókilderi bar. Jumys tobynyń jetekshisi bolyp depýtat Gúlnar Seıitmaǵanbetova taǵaıyndaldy»,- dedi.
Endi zań jobasy jumys tobynyń otyrystarynda talqyǵa túsetin bolady.
