Zań jobasynyń maqsaty - kásiptik odaqtardyń qyzmeti men eńbek qatynastaryn retteý
ASTANA. 12 qazan. QazAqparat - Qazir Parlament Májilisiniń qaraýyna engizilgen jańa zań jobalarynyń biri - «Qazaqstan Respýblıkasynyń keıbir zańnamalyq aktilerine kásiptik odaqtardyń qyzmeti jáne eńbek qatynastaryn retteý máseleleri boıynsha ózgerister men tolyqtyrýlar engizý týraly». Bul zań jobasy elimizdiń zańnamasyn «Kásiptik odaqtar týraly» negizgi zań jobasyna sáıkes keltirý maqsatynda ázirlengen.
Soǵan oraı memleketimizdiń birqatar zańnamalyq aktilerine ózgerister men tolyqtyrýlar engiziledi.
Atap aıtqanda, Eńbek kodeksinde kásiptik odaqtardyń, olardyń birlestikteriniń respýblıkalyq, salalyq jáne óńirlik áleýmettik áriptestik deńgeılerinde qyzmetkerlerdiń múddelerin bildirý ókilettiligi naqtylanady.
Sondaı-aq ujymdyq eńbek daýlaryn sheshýdiń áleýmettik mańyzdylyǵyn eskere otyryp, zań jobasynda ujymdyq eńbek daýlaryn qaraý kezinde bitimgerlik komıssııasynda kelisimge qol jetkizilmegen jaǵdaıda, medıatsııa rásimin mindetti túrde engizýdi qarastyrý usynylady.
Áleýmettik-eńbek daýlaryn retteýdiń, qoǵamdyq qaýipti quqyq buzýshylyqtardyń saldaryn azaıtý, áleýmettik shıelenistiń jáne eńbek daýlarynyń aldyn alý tıimdiligin arttyrý maqsatynda zań jobasynda Azamattyq is júrgizý kodeksine jáne «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańǵa túzetýler engizilmek. Naqty aıtqanda, sottardyń ereýilderdi zańsyz dep tanýy týraly isterdi qysqa merzimde qaraýy; jergilikti atqarýshy organdarǵa áleýmettik shıelenistiń monıtorıngin júzege asyrý jáne eńbek janjaldarynyń týyndaý qaterlerin boljaý jónindegi fýnktsııany bekitý bóligine túzetýler engizý usynylady.
Buǵan qosa, Memleket basshysynyń «Qazaqstannyń áleýmettik jańǵyrtylýy: jalpyǵa ortaq eńbek qoǵamyna qaraı jıyrma qadam» atty maqalasynda berilgen tapsyrmasyn iske asyrý maqsatynda zań jobasynda Halyqaralyq eńbek uıymynyń № 81 «Ónerkásiptegi jáne saýdadaǵy eńbek ınspektsııasy týraly» jáne № 129 «Aýyl sharýashylyǵyndaǵy eńbek ınspektsııasy týraly» ratıfıkatsııalanǵan konventsııalaryna sáıkes kásiporyndarda tekserý júrgizý bóliginde Eńbek kodeksine jáne «Qazaqstan Respýblıkasyndaǵy memlekettik baqylaý jáne qadaǵalaý týraly» Zańǵa ózgerister engizý kózdelgen.
Usynylǵan ózgeristerdi qabyldaý qyzmetkerlerdiń eńbek quqyqtary buzýylýynyń aldyn alý jáne oǵan jol bermeý sharalaryn qoldanýda memlekettik eńbek ınspektorlary qyzmetiniń tıimdiligi men nátıjeligin arttyrady.
Osy jylǵy 12 qyrkúıekte zań jobasy Áleýmettik seriktestik pen áleýmettik jáne eńbek qatynastaryn retteý jónindegi respýblıkalyq úsh jaqty komıssııanyń otyrysynda qaralyp, tujyrymdamalyq qoldaý tapty.
